OEL-UPUN (TOP) – Komunidade hamutuk 64 ne’ebé afetadu ba implementasaun projetu pilotu Zona Espesial ba Ekonómia Sosial no Merkadu (ZEESM) ne’ebé hahu iha tinan 2015 to’o 2019 iha Oe-Kusi Ambeno to’o oras ne’e seidauk hetan indemnizasaun, maibé Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano husu ba komunidade sira ne’e hein to’o 2021 mak foin bele hetan resposta, tanba oras ne’e osan laiha hodi selu.
"Ami abaixa asinadu nu'udar vitima, tanba ami nia rai, no propridade privada sira hanesan rai uja ba halo Hotel Fitun Lima Oel-Upun, rezidensia Fulolo, no alargamentu estrada husi Sakato to'o Tono, kapital Oe-Kusi Ambeno to'o Noé Fefan, uma no plantasaun afetada sira husi projetu boot desde tinan 2015 to’o tinan 2019 seidauk hetan indemnizasaun,” hateten portavoz rai afetadu Fulolo, Henrique Silva liu husi konferénsia ba imprensa iha Oel-Upun, aldeia Sanane, suku Costa, postu Pante Macassar, Oe-Kusi Ambeno, Kuarta 8 Jullu 2020.
Nia hatutan, iha alargamentu vítima balun hetan ona kompensasauna, la'os selu ho osan, maibé rai troka rai, ba plantasaun balun selu tiha ona kompensasaun ho ida ne'e Komunidade rai Afetadu la satisfas.
"Ami la satisfas tanba sa mak ami nia propriedade privada, la selu indemnizasaun, no autoridade nunka halo aproximasaun ho vitima sira. Ami vítima afetadu agradese mós ba Prezidente Autoridade atual, no ami kontente liutan, tanba Ambeno oan komprende ko'alia Laes Meto (Baikenu), no hatene klean problema ne'ebé mak akontese durante tinan lima nia laran," afirma Sila.
Regina Ola nu’udar afetadu ida katak hafoin projetu pilotu ZEESM tama iha Oe-Kusi Ambeno, nia lakon kedas nia direitu ba rai hamutu hektar 17, tanba autoridade sira uja hela nia rai hodi halo dezenvolvimentu, maibé to’o oras ne’e seidauk hetan kompensasaun ruma.
Nune’e mós vitima afetadu Fulolo, Domingos Neno Abi katak to’o oras ne’e seidauk hetan kompensasaun ruma.
"Uma ne'ebé mak husi governu muda ba fatin seluk ne’e hamutuk uma 4 inklui ha'u nian, maibé to'o agora sira sidauk selu ami nia uma. Uluk Mari Alkatiri mak estraga to'o ikus nia sai husi Oe-Kusi Ambeno, nia haluha tiha estragu sira ne'ebé halo," espresa Abi.
Nune’e, familia afetadu sira fó ultimatum ba Prezidente Autoridade atual Arsenio Paixão Bano tenke rezolve lalais problema iha fulan ida ne’e nia laran, maibé se la rezolve sira promete sei tun ba estrada hodi halo asaun pasifika kontra nia.
Entretantu, Prezidente Autoridade ba RAEOA, Arsenio Paixão Bano husu ba komunidade afeta sira hein to’o 2021 mak foin bele fó resposta.
"Ha'u ko'alia ona ho Primeiru-Ministru antes tomada pose ne'e tama ba ha’u nia lista atu hare kompensasaun ba tinan oin 2021, tanba ita agora la'o lori orsamentu duodesimu," resposta Bano.
