DILI (TOP) – Rezultadu enkontru Primeiru – Ministru Kay Rala Xanana Gusmão ho membru governu sira ka baibain hanaran reuniaun Konsellu Ministru sira ne’ebé hala’o iha kada loron Kuarta foti ona desijaun balun ba destinu Komisaun Ezekutiva ida iha Oe-Kusi Ambeno.
Reuniaun Konsellu Ministru ne’ebé hala’o iha loron Kuarta, 11 Juñu 2025 aprova ona projetu Rezolusaun Governu ba alterasaun dahaat ba Rezolusaun Governu n. 7/2024, loron 24 fulan-janeiru, kona-ba Kriasaun Komisaun Ezekutiva ho objetivu atu estabelese Zona Ekonómika Espesiál Dezenvolvimentu iha Oe-Kusi Ambeno (ZEEDOA).
“Ho alterasaun ida-ne’e, mandatu Komisaun Ezekutiva nian hanaruk ba períodu fulan haat. Durante períodu ida-ne’e, bandu kontratasaun hotu-hotu ba funsionáriu públiku, tékniku no asesór foun, tantu ba órgaun administrativu Rejiaun Administrativa Espesiál Oe-Cusse Ambeno (RAEOA) no ba Komité Ezekutivu ZEEDOA nian,” konteudu rezultadu Konsellu Ministru sira iha loron Kuarta, 11 Juñu 2025.
Desijaun ne’e mós hatutan, Prezidénsia Konsellu Ministrus nian tenke prepara dokumentu tékniku no jurídiku sira ne’ebé presiza ba kriasaun estrutura funsionál foun ida iha RAEOA, ne’ebé besik hanesan ho rejime munisipál ne’ebé adota iha divizaun administrativa sira seluk país nian, iha ne’ebé Atoni (Oekusi-oan) sira bele asume responsabilidade ba jestaun administrativa no ekonómika Rejiaun nian.
