NIPANI (TOP) – Governu sentral fó tomada posse ba Rogério Tiago de Fátima Lobato nu’udar Prezidente Autoridade (PA) ba Rejiaun Administrativu Espesial Oe-Cusse Ambeno (RAEO) iha loron 31 Janeiru 2024, maibé desde Fevereiru to’o Outubru seidauk hala’o vizita ofisial ba suku sira iha rai-ketan Ambeno maske iha nia Gabinete laran ne’e nakonu ho asesor sira kuaje nain-30 resin simu salariu mesak boot sugati de’it.
Molok simu tomada posse, PA Rogério sempre deklara bebeik ba públiku katak, nia ema FRETILIN duni, maibé ukun iha Oe-Cusse ne’e ukun CNRT nian. Deklarasaun ida ne’e kontraria tebes ho realidade iha Oe-Cusse Ambeno, tanba faktu hatudu hafoin tomada posse, nia lori ema FRETILIN sira husi Dili besik nain-30 resin sai asesor hotu iha nia gabinete laran ho salariu báziku husi $3000.00 to’o U$13000.00 kada fulan, maibé la halo buat ida to’o ohin loron. Sira izola fali ema CNRT no Oe-Cusse oan sira mak iha. Ida ne’e mak situasaun real, no situasaun loloos iha Oe-Cusse Ambeno ne’ebé durante ne’e governu sentral, liliu partidu CNRT iha nasionál la hare hetan.
PA RAEOA Rogerio Tiago de Fatima Lobato. Foto Media Estatal.
Faktu ne’e rasik, PA RAEOA Rogério Tiago de Fátima Lobato konfirma no rekoñese ona katak, desde simu tomada posse iha fulan Janeiru liu-ba to’o ohin loron nia seidauk iha tempu minutu ida atu hala’o vizita ofisial hodi ba hare kondisaun real moris povu sira iha suku sira ne’ebé eziste iha Ambeno, maibé viazen ba-mai Dili-Oe-Cusse Ambeno no rai-liur nia tempu iha hela de’it. Loos duni katak, PA Rogério desde simu posse to’o ohin loron mazimu nia gasta de’it loron rua hala’o serbisu iha RAEOA, no loron 4 sira seluk gasta barak liu iha Timor-Lodge Dili, no iha rai-liur. Situasaun ne’e bele konfirma ho lala’ok despeza ka gastu sira iha item viazen lokal no viazen estranjeiru nian.
Osan barak liu gasta ba viazen Dili – Oe-Cusse Ambeno no rai-liur, maibé lakohi gasta osan hodi halo viajen lokal ba suku sira iha Oe-Cusse Ambeno.
Inagurasaun projetu bee moos iha Suku Nipani, Postu Pante Makassar iha loron 18 Outubru 2024. Foto Media Estatal.
“Señor Ministru, dezde ha’u simu posse hanesan Prezidente Autoridade, ha’u seidauk iha tempu atu tuun ba suku no aldeia sira,” PA RAEOA Rogério Tiago de Fátima Lobato hateten ba Ministru Administrasaun Estatal Tomás do Rosário Cabral bainhira ba hamutuk inagura projetu bee moos iha Suku Nipani, Postu Pante Makassar iha loron 18 Outubru 2024.
Kondisaun moris posu sira iha suku sira iha Ambeno. Credit: Asesor Assuntu sosial Agustinho Caet.
Nia hateten, atividade sira-ne’ebé hala’o iha suku no aldeia, nu’udar atividade importante tebes, maibé bainhira Autoridade foun simu serbisu husi autoridade Anteriór sira, ne’ebé lidera husi Arsénio Paixão Bano iha problema barak, persiza hadi’a, maibé faktu hatudu to’o ohin loron seidauk hadia netik buat ida, tanba gasta tempu barak liu iha Timor-Lodge no estranjeiru do que iha Oe-Cusse Ambeno.
Kondisaun moris posu sira iha suku sira iha Ambeno. Credit: Asesor Assuntu sosial Agustinho Caet.
“Tanba primeiru ita tenki hadi’a uma laran, ita simu administrasaun ida ho problema barak, primeiru ita tenki hadi’a uma, hamoos uma mak depois sei lakleur tan, ha’u sei komesa tuun ba hela iha suku, ba hela la’os ba liu de’it mai ona, la hela ho imi ne’e labele, ne’e tenki,” PA Rogério Lobato promete ba xefe suku no xefe aldeia sira iha suku Nípani.
Nia dehan, objetivu tuun ba térrenu, atu ko’alia ho xefe suku no xefe aldeia sira, atu haree sira-nia susar, haree saida mak imi persiza, ko’alia ho labarik sira, tanba iha suku no aldeia ida la’os xefe suku de’it mak nia moris, maibé komunidade komposta husi feto, mane, labarik, ferik no katuas.
Kondisaun moris posu sira iha suku sira iha Ambeno. Credit: Asesor Assuntu sosial Agustinho Caet.
“Ne’e duni, ha’u senti katak, ha’u sei haree oinsa mak sei komesa tuun ba iha suku sira para ba hela ho imi, ba moris ho imi durante loron balu, ha’u labele hela iha ne’ebá fulan, tanba problema barak iha Pante Makasar, iha Oe-Cusse Ambeno laran, ita tenki rezolve, maibé pelu-menus tenki tuun ba halo kontaktu direitu no permanente ho komunidade iha baze,” nia afirma.
Kondisaun moris posu sira iha suku sira iha Ambeno. Credit: Asesor Assuntu sosial Agustinho Caet.
“Ha’u fiar katak, ho kooperasaun da-ne’ebé di’ak ho Ministru Administrasaun Estatál, ita sei lori buat barak di’ak mai iha Oe-Cusse Ambeno, hadi’a komunidade nia moris,” nia dehan.
Tuir Rogério Lobato, tanba rejionalizmu ne’ebé ejiste iha Oe-Cusse Ambeno, la signifika Autoridade RAEOA mak bele halo buat ruma no taka tiha odamatan ba iha Governu Sentrál, maibé estrutura ne’ebé iha RAEOA nomeia direitamente husi Governu Sentrál ne’ebé lidera husi Maun Boot Primeiru-Ministru Kay Rala Xanana Gusmão.
Kondisaun moris posu sira iha suku sira iha Ambeno. Credit: Asesor Assuntu sosial Agustinho Caet.
Nia lembra, Primeiru-Ministru sempre dehan katak, durante tempu naruk halo dezenvolvimentu de’it iha Pante Makasar. Agora to’o ona tempu atu konsentra atensaun ba komunidade sira-ne’ebé moris iha foho.
“Ita-nia katuas no ferik sira iha foho, sira hein tinan 24, atu hetan independensia, hetan tiha independensia, sira hein tán tinan 20-resin, maib’e dezenvolvimentu seidauk to’o sira-nia uma laran, entaun oras ne’e ita tenki halo oin seluk, inves ita lori dezenvolvimentu husi kapitál ba iha foho ita tenki lori husi foho mai kapitál, atu fó atensaun tomak ba komunidade iha baze hanesan ita-nia Primeiru-Ministru hakarak”.
Kondisaun moris posu sira iha suku sira iha Ambeno. Credit: Asesor Assuntu sosial Agustinho Caet.
“Maibé ha’u dehan de’it, Governu Rejionál Oe-Cusse Ambeno nian, oras ne’e serbisu metin no kooperasaun ho Governu Sentrál, ita kompleta malu, sira-ne’ebé mai kaer serbisu iha ne’e, la’os atu taka dalan ba serbisu sentrál, ida-ne’e labele, iha ha’u-nia mandatu ne’e, ha’u sei la husik ida-ne’e akontese, Oe-Cusse Ambeno tenki nakloke ba ema hotu”.
Author: The Oekusi PostWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál.
Rua. Numbei, Oe-Kusi Ambeno
Mobile: +670 7723 4114
Email: info (at) OeKusiPost.com
