PAUT (TOP) – Kompañia Irmão Timor Unipessoal, Lda ne’ebé raut-tasu no bosu didi’ak durante mandatu ukun governu FRETILIN nian iha Rejiaun Administrativu Espesial Oe-Kusi Ambeno (RAEOA) oras ne’e abandona tiha projetu rehabilitasaun estrada rural husi bairru Paut, Aldeia Oe-Baha iha postu Oe-Silo, Suku Bobometo ba Bitopa iha Suku Usi-Tasa’e durante fulan hitu (7) ona.
Kompañia Irmão Timor Unipessoal, Lda manan projetu rehabilitasaun estrada rurál ne’e hahu iha loron 18 Jullu 2023 ho nia distansia kilometru 7,2 husi bairru Paut ba to’o Bitopa ho montante USD 544,055.33, no tuir akordu katak, durasaun ba implementasaun projetu ne’e to’o fulan sia (9) nia laran tenke entrega ona ba Autoridade RAEOA. Katak, tuir loloos kompañia tenke entrega ka finaliza ona projetu ne’e iha fulan Marsu 2024, maibé realidade no faktu hatudu, to’o ona fulan Outubro mós projetu ne’e seidauk hotu hela de’it. Sura husi fulan Marsu 2024 to’o fulan Outubro ne’e, kompañia Irmão Timor Unipessoal, Lda abandona projetu ne’e durante fulan hitu (7) ona.
The Oe-Kusi Post (TOP) tun ba observa direta projetu rehabilitasaun estrada rurál ne’e hatudu, kompañia Irmão Timor Unipessoal, Lda la’os abandona de’it projetu ne’e, maibé projetu estrada ne’e nia kualidade mós laiha liu, ninia kualidade ne’e kasian tebes tanba simentu ne’ebé kompañia uja ba iha estrada ne’e mihis tebes, la mahar, no la kaber ida. Ho nune’e mak, maske seidauk entrega ba governu, maibé simentu ne’e oras ne’e hahu nakfera no nakonu ho rai-rahun.
Tanba projetu rehabilitasaun estrada rurál ne’e abandonadu no laiha kualidade, Xefe Suku Bobometo, José Labi Caet husu no sujere ba Autoridade RAEOA liu husi Diresaun Rejionál Infraestrutura tenke ba halo fiskalizasaun ba projetu ne’e bele identifika loloos ninia kualidade. No tenke bolu atensaun ba kompañia Irmão Timor Unipessoal, Lda hodi bele halais no hadia kualidade projetu estrada ne’e.
“Ha’u seidauk hatene kompañia mak lakohi atu finaliza ka oinsa, maibé loos projetu rehabilitasaun estrada ne’e laiha kualidade duni. Ha’u ko’alia hanesan ne’e la’os dehan ita atu keixa malu, maibé ida ne’e realidade duni, tanba ema barak mak liu husi ne’eba ne’e sira hare raise ho matan. Ha’u husu ba Autoridade RAEOA atu koloka tékniku sira mai haree halo fizkalizasaun, katak obra ne’e tuir duni regra no item BoQ nian ka la’e atu hatene konstrusaun ne’e,” José Labi Caet hateten ba jornalista sira iha sede Suku Bobometo iha Aldeia Tumin foin allais.
Projetu rehabilitasaun estrada rurál ne’e liga ba suku barak iha Oe-Kusi Ambeno, maibé suku ne’ebé besik liu mak suku Bobometo no suku Usi-Tasa’e.
Nune’e, Xefe Suku Usi-Tasa’e Tomas Ulan Colo mós lamenta tebes ba kompañia ne’ebé jere projetu ne’e ladun iha responsabilidade, tanba nia rekoñese laiha duni kualidade no abandonadu tiha ona.
“Projetu ne’e nia durasaun kontratu fulan sia de’it, loloos remata ona iha Marsu 2024, maibé to’o ohin loron seidauk finaliza, no ita haree obra ne’e laiha kualidade, tanba simentu ne’ebé nahee nakfera fali ona, no gabiaun mós laiha, ne’ebé tempu udan bele estraga tiha estrada ne’e,” nia hateten.
Xefe Suku ne’e mós husu no sujere ba Autoridade RAEOA atual hamutuk ho Sekretariu Regional sira tenke bo’ok itoan hodi ba hare rasik ho matan ba projetu rehabilitasaun estrada ne’e inklui projetu sira seluk ne’ebé Autoridade RAEOA anterior husik hela iha Ambeno ne’ebé balun hatudu laiha kualidade, maibé deskonfia prosesu pagamentu ne’e halo tiha ona.
Preokupasaun hanesan mós hato’o husi Xefe Aldeia Oe-Baha Marcelino Ole katak, projetu rehabilitasaun estrada ne’e lokaliza kedas iha ninia Aldeia no rekoñese katak, kompañia ne’ebé manan projetu ne’e hatudu duni nia inkapasidade no laiha responsabilidade hodi halo projetu estrada ne’e laiha kualidade no la’o kleur liu.
“Estrada husi Paut ba Bitopa nia kualidade ne’e la di’ak ida, tanba sira nahee simentu ne’e pedasuk-pedasuk de’it depois nahee simentu ne’e mihis-liu, nune’e oras ne’e simentu nakfilak ba rai-rahun maka’as, ne’ebé ha’u husu ba Obras Públika atu bolu kompañia konstrutora ne’e tenke hadia nia kualidade no aselera lalais dalan ne’e, tanba agora Outubru kuandu tama Novembru udan monu-rai sei fó impaktu ba komunidade sira, tanba bee-dalan la iha sei estraga mós ba estrada ne’e,” nia hateten ba jornalista sira iha Oe-Baha.
Hatan ba ezijensia no preokupasaun hirak ne’e, Autoridade RAEOA liu husi Diretór Diresaun Rejionál Infraestrutura (DRI), Remigío Nunu Sila katak, DRI RAEOA orienta ona kompañia hodi kontinua halo reabilitasaun nune’e bele garante kualidade ba projetu ne’e.
“Ita-nia ekipa monitorizasaun iha semana kotuk ba halo monitorizasaun konjunta, atu haree tanba projetu rehabilitasaun estrada rurál ne’e la’o atraza, no balun paradu hela, entaun impkatu ba estrada kualidade nian laiha, ami haree ona, no rekomenda ona ba kompañia atu hadiak kualidade estrada ne’e,” nia esplika.
Maske kompañia Irmão Timor Unipessoal, Lda mak laiha seriedade no laiha responsabilidade ba estrada ne’e hodi hadiak nia kualidade, maibé nain ba kompañia Irmão Timor Unipessoal, Lda Júlio Mak fila-lia hodi hatudu fali nia liman-fuan ka duun matak fali ba komunidade sira mak estraga tiha estrada ne’e nia kualidade.
Tuir klarifikasaun husi Diretor ka Patraun Boot Kompañia Irmão Timor Unipessoal, Lda ba Ajensia Notisioza TATOLI katak, nia fase-liman ka akuza fali komunidade sira mak la iha konsiénsia, tanba kompañia la autoriza atu ultrapasa ka uja estrada ne’e durante proses konstrusaun ne’e la’o hela.
“Ita taka dalan foin cor tiha, kalan sira (komunidade) loke-fali sira liu nafatin, ita aviza liu-husi kuadru avizu, maibé fokit sai tiha. Agora se mak sala, ita foin cor taka atu labele ultrapasa lai, maibé kalan liu nafatin ho karreta no motor,” nia klarifika.
Diretor ka Patraun Boot Kompañia Irmão Timor Unipessoal, Lda Júlio Mak nia klarifikasaun ba TATOLI ne’e kontraria tebes ho faktu iha terenu, tanba The Oe-Kusi Post (TOP) tun ba observa direta projetu rehabilitasaun estrada rurál ne’e hahu husi bairru Paut ba to’o Bitopa, maibé la hatudu no la hetan roda-motor no roda-kareta nian belit iha simentu leten hodi bele hatudu katak, komunidade sira mak estraga duni estrada ne’e, maibé faktu loloos hatudu duni katak, simentu ne’ebé kompañia Irmão Timor Unipessoal, Lda uja ba rehabilita estrada rurál mak mihis-liu, no la kaber ida hanesan estrada rurál sira ne’ebé halo husi PNDS nian.
Dadus husi Timor-Leste eProcurement Portal hatudu, kompañia Irmão Timor Unipessoal, Lda hahu hetan projetu iha tinan 2014 hamutuk tolu ho montante USD 594,674.02, no iha tinan 2017 kompañia ne’e hetan projetu ida de’it ho montante USD 736.00.
Iha tinan 2021, kompañia Irmão Timor Unipessoal, Lda hetan projetu hamutuk 46 ho montante USD 414,137.44. Iha fali tinan 2022, hetan tan projetu hamutuk 29 ho montante USD 457,083.20. Iha tinan 2023 hetan projetu hamutuk hamutuk 20 ho montante USD 1,790,003.47. Iha fali tinan 2024, kontinua hetan tan projetu hamutuk 10 ho montante USD 10,160.00.
Ne’ebé total projetu sira ne’ebé Irmão Timor Unipessoal, Lda hetan desde tinan 2014 to’o 2024 hamutuk 109 ho montante USD 3,266,794.13.
Maske kompañia ne’e atu sai hanesan anak emas “oan-istimadu” durante mandatu Prezidente Autoridade RAEOA Arsenio Paixão Bano nian liu husi fó nia projetu hamutuk 46 ho montante USD 414,137.44 iha tinan 2021, no fó tan projetu hamutuk 29 ho montante USD 457,083.20 iha tinan 2022 inklui tan projetu hamutuk 20 ho montante USD 1,790,003.47 iha tinan 2023, maibé bainhira mosu mudansa politika iha rai-laran, katak mosu estrutura foun iha RAEOA, kompañia ne’e hahu abandona tiha projetu estrada Puat ba to’o Bitopa ne’e no a’at liu-tan projetu estrada ne’e laiha liu kualidade.
