Oekusipost.com Ambeno - Fatin ba suspeitu virus corona iha Rejiaun Administrasaun Espesial Oe-Kusi Ambeno (RAEOA) hanaran Sentru Akollimentu, la’ós kuarentena.
Iha Oe-Kusi Ambeno mós akumula ema lubuk ida ne’ebé foin fila husi tasi balun, hanesan husi Indonézia no nasaun balun tan. Ema hirak ne’e autoridade Oe-Kusi A mbeno simu sira, no tau sira iha fatin di’ak tebes hanesan iha Hotel-Lifau, Hotel Fitun Lima iha Oel-Upun no fatin ida tan mak iha eis rezidensia Sekretariu Rejional sira iha Fulolo.
Ema hirak ne’e hetan akomodasaun di’ak no naton, hetan mós kontrola bebeik husi médiku sira iha rai-ketan ne’e.
Iha loron Kinta 9 Abril 2020, Nadi a Oematan Heywood ho laran luak no laran kontente ajuda pateka hamutuk fuan 80 ba Sentru Akollimentu rua iha Oe-Kusi Ambeno. Sentru Akollimentu Hotel-Lifau hetan pateka hamutuk 24, no Sentru Akollimentu Hotel Fitun Lima hetan fuan 56.
Nadia fahe pateka sira ne’e ho gratuita de’it, tanba nia kuda pateka barak loos iha Mahata.
“Agora governu osan laiha, governu mós fó han ema sira ne’e ho etu no modo simples de’it lorloron. Governu la fó sira nutrisaun di’ak, tanba ne’e mak ha’u hatete ba ha’u nia apa katak ita oferese hela pateka ba sira hodi han,” esplika Nadia via kontaktu telemovél ba Oe-Kusi Post, Kinta 9 Abril 2020.
Nadi a ne’ebé hela iha Mahata, no foin mak tinan dahuluk eskola iha eskola pre-sekundária ida iha Oe-Kusi Ambeno hatutan, sei kontinua ajuda autoridade RAEOA liu husi fahe pateka ba ema sira ne’ebé oras ne’e kumpri hela loron 14 iha Sentru Akollimentu sira.
“Sei kontinua fó tanba ami nia to’os ne’e pateka mak nakonu,” esplika Nadi a.
Entretantu, Diretór Interinu Saúde RAEOA, Marcos Seo hato'o agradesimentu uain ba ajudu ne'e.
T uir informasaun balun ne’ebé Oe-Kusi Post asesu katak prosesu sosa ai-han ba ema sira iha Sentru Akollimentu sira iha Oe-Kusi Ambeno oras ne’e uja de’it osan cash. Autoridade seidauk selebra kontratu ruma ho empreza lokal sira hodi fornese ai-han.
Ema hamutuk nain 115 mak oras ne’e hela iha Sentru Akollimentu sira iha RAEOA, no nain 50 mak kumpri ona loron 14.
Notisia Relevante: Ema Nain 115 Tama Sentru Akollimentu Iha Ambeno
