AINARO (TOP) – Estudante pre-sekundáriu no sekundáriu husi Escola Sekundariu Catolica Santa Maria Ainaro halo ona “juramentu” ba eis Komandante em Chefe das FALINTIL, Kay Rala Xanana Gusmão katak sira sei estuda maka’as hodi prepara aan atu lori Ainaro, no Timor-Leste ba oin bainhira lideransa jerasaun tuan sira laiha ona.
Molok desloka ba suku Mau-Ulo, Kay Rala Xanana Gusmão ho nia komitiva sira vizita uluk madre Canosiana sira iha Ainaro villa depois kontinua kedas vizita eskola pre-sekundáriu no sekundáriu Catolika ne’e.
Maske vizita ne’e ho loron Sábadu, maibé estudante sira dadersan de’it halo ona formatura no hatais uniforme eskola nian kompletu hodi hein vizita lider karismátiku ne’e. Hafoin tama to’o áreador eskola nian, mestre sira fó oportunidade ba Xanana hodi hato’o netik mensajen badak ida ba estudante sira.
Xanana husu ba estudante sira tenke estuda maka’as, tanba futuru munisipiu Ainaro, no futuru Timor-Leste iha jerasaun foun (estudante) sira nia liman.
Hafoin remata diskursu, estudante sira loke liman karuk, no liman loos lolo sa’e ba lalehan hodi dehan;
“Futuru iha ha’u nia liman rasik. Ainaro nia futuru iha ami nia liman, Timor-Leste nia futuru iha ami nia liman,” deklara estudante sira, iha Ainaro, Sábadu 11 Jullu 2020.
Xanana hasai palavra de ordem ida katak foin sa’e sira tenke kuda dame, kari domin iha sira nia moris lorloron, no iha sosiedade nia le’et hodi hametin liutan unidade nasionál.
Liu tiha ida ne’e, Xanan ho nia komitiva kontinua ba suku Mau-Nuno, postu Ainaro, munisipiu Ainaro hodi kontinua fahe nesesidade báziku ba kbi’it la’ek sira.
