BALIBO (TOP) - Família ida iha Aldeia Caco, Suku Sanerin, Postu Administrativu Balibó, Munisípiu Bobonaro, enfrenta hela situasaun triste, hafoin inan no aman mate tuir-tuir malu iha fulan ida nia laran, husik hela oan-kiak na’in-lima, inklui bebé ida ne’ebé foin kompleta nia idade ba fulan haat.
Tuir Komunikadu ba Imprensa ne’ebé The Oe-Kusi Post asesu iha Pájina Ofisial Presidência da República Democrática de Timor-Leste katak, lia triste ne’e, hato’o liu husi oan feto boot, Rosalina da Purificação, iha nia “carta” ne’ebé nia lee diriji ba Prezidente Ramos-Horta liu husi video ho durasaun minutu ida. Nia husu apoiu umanitáriu no tulun sira-nia asesu ba estudu iha futuru.
“Ami oan-kiak na’in-lima hato’o ami-nia komprimenta “Boatarde” ba Avo Nai Prezidente. Atu husu tulun ba Prezidente ho Avo nia laran luak ajuda ami na’in-5. Ami-nia inan Mate foin semana 3 liubá no ami-nia aman foin lalais mak mate. Ami husu atu Prezidente bele tau matan mai ami-nia eskola, hahan no hatais,” dehan Rosalina iha Aldeia Caco, Suku Sanerin, Postu Administrativu Balibó, Munisípiu Bobonaro, 12 Maiu 2026.
Simu tiha informasaun ne’e, Prezidente orienta kedas nia ekipa Unidade Servisu Sosiedade Sivíl no Asuntu Sosiál (SSSAS) Prezidénsia Repúblika, hodi halo vizita urjente ida ba família refere.
Assesor Prezidénsia Repúblika, Quintiliano Moniz hateten katak, sira-nia parte sei koopera ho autoridade munisipál no Ministériu Edukasaun atu garante ba oan sira-nia asesu ba edukasaun no apoiu sosiál.
“Husi Prezidénsia kompromete atu kontinua tau matan liu-liu ba bebé ne’ebé sei iha fulan haat no sei fó asisténsia kondisaun saúde ba família ne’e”. Hateten Quintiliano.
Tuir kronolojia ne’ebé hato’o husi família no komunidade viziñu katak, sira-nia inan Matebian Aliança Maia, antes ne’e moras dadaun ona hafoin matebian fó partu ba nia oan feto ikun, liu husi prosesu operasaun iha ospitál. Kondisaun ne’e grave liután bainhira to’o fulan haat de’it, família refere simu realidade katak sira-nia inan hakotu iis (mate) no husik hela oan na’in-haat ho bebé ida ne’ebé sei ki’ik-oan foin halo ba fulan-haat.
Liu tiha semana rua, ninia la’en, Anselmo da Purificação, mós hakotu nia iis tanba ho presaun emosionál no psikolójika.
Oras ne’e, oan kiak nain-lima hela hamutuk ho sira-nia avó feto no inan-bin boot ne’ebé agora assume responsabilidade atu tau matan hela ba sira.
Xefe Suku Sanerin, Francisco R. Tavares, agradese ba Prezidente Ramos-Horta tanba bele responde lalais ba situasaun família refere, hodi haruka kedas ekipa husi Gabinete Prezidénsia atu ba fó apoiu direta.
Iha vizita refere, ekipa Prezidénsia Repúblika mós entrega apoiu nesesidade bázika hanesan fos, mina, roupa no osan balun ne’ebé mai husi Prezidente nia bolsu rasik, hodi ajuda hakmaan ba família refere iha tempu emerjénsia ne’e.
