Oekusipost.com Dili – Jerente Klinika Bairo Pite, Inacio dos Santos hatete, durante ne’e matebian dotor Daniel Murphy nia kondisaun saúde saudavél, no sempre tama serbisu hela de’it, maibé iha loron Tersa 14 Abril 2020 oras dadersan mak dotor foin sente nia kondisaun saúde ne’e la dun di’ak.
Tuir observasaun Oe-Kusi Post, funsionariu Klinika Bairo Pite foti dotor Daniel nia mate isin iha nia uma iha Pante Kelapa iha tuku 9 kalan, no tula ba kareta ambulansia Klinika Bairo Pite nian hodi lori mate isin ne’e ba hatoba iha nia Klinika ne’e rasik. To’o ne’eba, maske situasaun ne’e iha hela Estadu emejénsia, maibé iha ema lubun mak hein ona iha Klinika ne’e nia laran.
Inacio hatutan, iha semana rua liuba relasiona ho moras virus corona (COVID-19) nia husu ba dotor Daniel atu bele deskansa, maibé dotor Daniel fila hatan ba nia katak se atu deskansa ne’e Descansa em Paz de’it ona.
“Ohin dader nia telefone mai ha’u katak, nia kondisaun la dun di’ak, nia presija deskansa. Ne’e mak ha’u dehan ba nia katak dotor bele deskansa itoan depois sente ba la di’ak bele mai konsulta,” hatete Inacio ba Jornalista sira iha Klinika Bairo Pite, Tersa 14 Abril 2020 oras tuku ualu kalan.
“No ohin tuku 8:15 kalan hanesan ne’e nia oan feto ne’ebé hela ho nia telefone ha’u katak dotor labele bo’ok a’an, entaun ha’u mai husi uma ha’u to’o iha ne’e fó hatene ba kolega médiku sira ba to’o dotor nia fatin, to’o ne’eba katuas iis laiha tiha ona. Ami tenta atu salva katuas mós labele tiha ona,” nia esplika.
Nia hatutan, durante dotor Daniel nia kondisaun di’ak hela. Laiha moras ruma, maibé deskonfia dalaruma atakasaun iha fuan ne’e mak lalais de’it.
“Durante fulan hirak nia laran ha’u husu nia atu deskansa, maibé nia lakohi. No lia menon ne’ebé nia hatete ha’u katak karik nia mate mós labele taka klinika ne’e, tenke la’o nafatin, no nia isin maten tenke hakoi de’it iha portaun boot Klinika Bairo Pite ne’e, labele haruka ba Amerika,” nia esplika.
Nia hatutan, durante ne’e dotor Daniel hamenon hela ba nia jerente Klinika ne’e katak bainhira nia mate karik tenke hakoi de’it iha Klinika ne’e nia laran, no di’ak liutan hakoi de’it iha portaun boot klinika ne’e atu pasiente sira la’o tama-sai bele sama nia rate fatin.
Entretantu, tuir informasaun balun ne’ebé Oe-Kusi Post asesu katak, matebian dotor Daniel Murphy moris iha loron 23 Setembru 1944 iha Alton Iowa, Estadu Unidus Amerika. Dotor Daniel simu nia titulu MD husi Universidade Iowa. Nia serbisu hamutuk ho Caesar Chavez iha klinika ida ba traballador rural sira durante tinan 6 nia laran, no hahu involve iha lejislasaun inisiu kontra abuzu pestisida. Iha nia kareira dahuluk, serbisu nu’udar médiku iha Moçambique, Laos, no Nicarágua. Dotor Daniel hahu serbisu iha Timor-Leste iha fulan Setembru tinan 1998. Liu tiha fulan balun nia laran forsa Indonézia sira obriga hasai nia husi Timor, maibé ikus mai nia fila mai Timor iha tinan 1999 kompromete fornese kuidade saúde gratuita ba ema kbi’it la’ek sira iha Timor-Leste liuhusi Klinika Bairo Pite.
Desde dotor Daniel harii Klinika Bairo Pite iha tinan 20 liuba konsege salva ona maluk Timoroan barak, maibé hahu ohin ba oin Timoroan sira sei la hetan no la hasoru tan ona dotor Daniel Murphy. Adeus dotor, no hela ho hakmatek iha leten a’as ba.
