DILI (TOP) – Durante ne’e ema barak tantu pesoal no grupu sempre uja hotel sira iha Dili laran inklui Hotel JL Villa iha Fatuhada, Dili hodi hala’o sira nia atividade sira, maibé molok desidi atu ba uja espasu ka aluga fatin sira iha Hotel JL Villa nia laran, tenke hanoin didi’ak, tetu didi’ak mak foin bele ba, tanba nia presu adisional ne’e hanesan de’it ho nia presu orijinal.
Ijemplu konkretu tuir dokumentu balun ne’ebé The Oe-Kusi Post (TOP) asesu no iha katak, antes ne’e iha 1 Outubru 2020 iha pessoal ida fofoun hakat uluk ba hare fatin iha Hotel The Ramelau iha Comoro, Ai-Mutin hodi aluga, maibé espasu laiha ona, tanba governu uja hela fatin ne’e ba kuarentena. Nune’e, tesik ba hare fali iha JL Villa iha Fatuhada no konsege hetan espasu ida ne’ebé bele uja iha loron Tersa 13 Outubru 2020.
Pessoal ne’ebé presija fatin ne’e hodi uja ba eventu loron ida nian de’it, no funsionáriu JL Vill ida naran Grace hasoru malu ho pessoal ne’e iha meja resepsionista esplika, kuandu presija fatin ba ema nain 20 inklui kafé dader, kafé lorokraik no han meudia dala ida maka hamutuk U$660.00 Hafoin rona tiha esplikasaun, pessoal ne’e mós selu kedas osan cash hamutuk U$660.00 iha loron 1 Outubru 2020 hodi bele realiza nia eventu loron ida nian iha loron 13 Outubru 2020.
Nune’e iha loron Tersa 13 Outubru liuba ne’e, pessoal ne’e konsege realiza nia eventu ne’e la’o ho di’ak no susesu, tanba hetan partisipasaun maximu hosi nia maluk sira. Tarjetu partisipante sira ne’ebé atu partisipa iha eventu ne’e maka ema nain 20, maibé partisipante sira mai barak liu tiha bainhira realiza eventu ne’e. Tuir lista prezensa ne’ebé iha katak, total partisipante sira iha eventu ne’e hamutuk nain 30 resin.
Tanba hare ba númeru partisipante sira aumenta ka liu husi ema nain 20 maka pessoal ne’ebé organiza eventu ne’e imposivél atu haruka sira fila, maibé desidi ko’alia ho staff Hotel JL Villa naran Grace katak, favór aumenta tan itoan kuantidade kafé dader, kafé lorokraik no han meudia nian, tanba partisipante sira aumenta. Nune’e, staff ne’e mós desidi aumenta, maibé saida maka akontese bainhira eventu ne’e remata iha parte lorokraik, staff ne’e imprime tiha ona invoice adisional ho montante U$660.00 ne’ebé hanesan de’it ho presu orijinal iha loron 1 Outubru 2020.
“Ha’u hakfodak bainhira hare presu adisional ne’e hanesan de’it ho presu orijinal ne’ebé ha’u selu tiha ona iha loron 1 Outubru foin lalais. Ha’u hanoin katak presu adional ne’e sei labele hanesan ho presu orijinal nian. Ohin mós total partisipante sira nain 30 resin de’it, la’os nain 40 maka pressu adisional ne’e tenke hanesan ho pressu orijinal,” esplika pessoal ne’ebé organiza eventu ne’e bainhira halo diskusaun ba malu ho staff JL Villa naran Grace iha JL Villa Fatuhada, Dili, Tersa 13 Outubru 2020.
Staff JL Villa ho naran Grace ne’e esplika, sira nia regulamentu maka hanesan ne’e ona.
“Ida ne’e ami nia regulamentu maun, tenke selu hanesan ne’e tanba se la’e orsida ko’a fali ami nia osan maka selu fali,” Grace esplika.
Entretantu, partisipante ida ne’ebé akompaña diskusaun ne’e sente dúvida tebes ho pressu adisional Hotel JL Villa nian hanesan de’it ho pressu orijinal.
“Mana ha’u mós ema otelaria, maibé mana bele check otel sira iha mundu tomak katak presu adisional ne’e nunka atu hanesan ho pressua orijinal, tanba ohin aumenta ema itoan de’it, la’os aumenta tan ema nain 20,” partisipante ne’e esplika.
Pessoal organizador eventu ne’e hatutan, nia halo diskusaun ho staff JL Villa ne’e la’os ho intensaun atu lakohi selu pressu adisional ne’e, maibé atu husu klarifikasaun kona-ba rajaun saida maka pressu adisional ne’e hanesan de’it ho pressu orijinal maske númeru partisipante la to’o ema nain 40, maibé 30 resin de’it.
Tanba pessoal organizador ne’e lakohi atu halo diskusaun bebeik kona-ba kestaun ne’e, ikus mai nia konsege selu duni pressu adisional ho montante U$660.00. Nune’e, total gastu eventu loron ida iha Hotel JL Villa ne’e hamutuk U$1200.
“Ha’u rekomenda no sujere ba públiku no maluk sira seluk katak, karik tempu ruma presija fatin hodi halo eventu ruma, tenke hanoin didi’ak no tetu didi’ak molok mai uja fatin sira iha Hotel JL Villa ne’e, tanba bainhira mosu adisional ruma sira nia pressu adisional ne’e sei hanesan ho pressu inisiu ka pressu orijinal, no dalaruma bele liutan. Tanba ne’e koidadu maluk sira,” sujere pessoal ne’e.
