DILI (TOP) – Governu liu husi desijaun Konsellu Ministru sira ezonera ona Prezidente Konsellu Administrasaun Timor Gap-Timor Gás & Petrólu, E.P, Francisco da Costa Monteiro, no nomeia hikas António José Loiola de Sousa.
Desijaun ezonerasaun ne’e akontese iha reuniaun Konsellu Ministru iha loron Kuarta 8 Jullu 2020.
Timor Gap-Timor Gás & Petrólu, E.P nu’udar Kompañia Nasionál Pertóleu Timor-Leste nian estabelese iha tinan 2011 ho dekretu lei Númeru 31/2011 ho nia objetivu prinsipal mak halo asaun hodi Estadu nia naran hala’o negósiu iha setor petroleum no Gás. Nia atividade iha variedade husi Onshore ba Offshore no husi nasionál ba internasional. Francisco da Costa Monteira jere kompañia Estatal ne’e kleur ona, no foin troka iha tinan 2020 ne’e.
TIMOR GAP, E.P nia portofóliu ida mak ajuda governu Timor-Leste hodi alkansa ba implementasaun projetu Tasi Mane – Baze Abastesimentu Suai, Refinaria Betano, Fábrika GNL Beaço no auto-estrada (High Way) ne’ebé liga sentru tolu.
Maske antes ne’e Ministru Petróleu no Minerais, Víctor da Conceição Soares promete atu realiza mehi no planu Kay Rala Xanana Gusmão nian atu lori kadoras mai Timor-Leste, maibé faktu politika hatudu difisil itoan, tanba governu atual nia mandatu badak hela, governu ne’e sei hotu iha tinan 2023. Nune’e, imposivel atu lori kadoras mai rai-laran iha tempu ida badak hanesan ne’e.
Faktu seluk mós hatudu, Timor-Leste manan ona nia direitu soberania maritima ho Austrália iha tinan 2018, no dezenvolvimentu fiziku balun ne’ebé eziste ona iha Tasi Mane mak hanesan aeroportu, auto-estrada no seluk, tanba prosesu negósiasaun ba investor sira atu mai investe iha rai-laran hodi bele dada kadoras mai Timor-Leste mak dalaruma sei difisil itoan, tanba desde tinan 2017 to’o ohin loron Timor-Leste hasoru hela instabilidade politika. Situasaun politika iha rai-laran ne’ebé la’o kuaje tinan tolu ona la dun fó garantia, la fó serteja no klareza ba investor sira atu mai investe iha nasaun ki’ik ne’e.
