Oekusipost.com Dili – Ekipa ambulansia evakua tan ona pasiente virus corona (COVID-19) husi Hotel Fortuna ba sentru izolamentu iha sentru saúde Vera Cruz.
Ho evakuasuan ne’e hatudu katak, total pasiente COVID-19 ne’ebé oras ne’e tama iha sentru izolamentu Vera Cruz hamutuk nain 8 ona, mesak Timoroan de’it.
Observasaun Oe-Kusi Post iha fatin evakuasaun ne’e akontese iha oras tuku 9 kalan. Prosesu evakuasaun ne’e hetan seguransa maka’as husi Polisia Nasionál Timor-Leste (PNTL) hodi blokeia kedas estrada boot diresaun Hudi-Laran tunba Elemloi. Blokea estrada ne’e iha kedas estasaun kombustivel Hudi-Laran nian. Prosesu evakuasaun ne’e mós la to’o oras, no lori kedas ba Vera Cruz hodi hetan tratamentu intensivu.
“Pasiente ohin ne’e mane oan ida, no informasaun balun ne’ebé iha katak antes ne’e nia mós involve iha atividade Tik Tok ne’ebé sai viral iha media sosial,” hatete pessoal seguransa Hotel Fortuna ba Oe-Kusi Post iha Hotel-Fortuna, Surik-Mas, Kuarta kalan 15 Abril 2020.
Kareta ambulansia tama ba Hotel-Fortuna hodi evakua tan pasiente COVID-19 mane ida hodi lori ba sentru izolamentu Vera Cruz, Kuarta 15 Abril 2020. Foto Oe-Kusi Post/Raimundos Oki
Hafoin foti pasiente COVID-19 ne’e iha Hotel Fortuna, Oe-Kusi Post mós tuir kedas kareta ambulansia ne’e to’o iha estrada atu tama ba sentru izolamentu Vera Cruz.
Entretantu, rezultadu final kona-bá pasiente COVID-19 mane ne’e sei fó sai husi Sentru Integradu ba Jestaun Krize aban Kinta 16 Abril 2020.
Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. No Kuarta ohin 15 Abril 2020, rezultadu teste hatudu timoroan nain 2 tan positivu ona. Husi númeru hirak ne’e hatudu katak to’o oras ne’e Timoroan hamutuk nain 7 mak positivu ona kona-ba moras COVID-19 iha Timor-Leste. Sira nain 7 ne’e oras ne’e kontinua hetan tratamentu intensivu iha sentru izolamentu iha sentru saúde Vera Cruz.
No pasiente mane ida ne'ebé evakua tan husi Hotel-Fortuna ne'e sei anunsia sai husi Sentru Integradu Jestaun ba Krize iha loron Kinta 16 Abril 2020, maibé faktu hatudu katak total pasiente COVID-19 iha sentru izolamentu ne'e sa'e ona ba nain 8, mesak Timoroan de'it.
