Oekusipost.com Dili – Iha Kuarta 15 Abril 2020 oras tuku 9 kalan, Oe-Kusi Post hasai notisia ida kona-bá ekipa ambulansia evakua tan pasiente COVID-19 ida husi fatin kuarentena Hotel-Fortuna iha Surik-Mas lori ba tau iha sentru Izolamentu iha sentru saúde Vera Cruz.
Maske jornalista Oe-Kusi Post halo reportazen ba moras COVID-19 husi liña dahuluk (front line), maibé hafoin notisia ne’e sai, mosu komentariu barak entre pro-kontra, fiar no la fiar. Ikus mai, dotora Odete da Silva Vieagas husi Sentru Integradu ba Jestaun Krize rekoñese ona katak pasiente COVID-19 husi Hotel-Fortuna ne’e iha ona sentru izolamentu, maibé sei hein hela nia rezultadu entre positivu ka negativu.
Notice relevant: Ambulansia Evakua Tan Pasiente Mane Ida Husi Hotel Fortuna
“Ita tenke halo mudansa ba nia. Halo nafatin observasun hodi hein nia rezultadu teste,” hatete dotora Odete liu husi konferensia imprensa iha Sala Situasaun Sentru Integradu ba Jestaun Krize iha Sentru Konvensaun Dili, Kinta 16 Abril 2020.
Nia hatutan, SIJK sei fó sai tan informasaun kompletu iha loron Sesta aban 17 Abril 2020 kona-bá kazu positivu sira ne’ebé oras ne’e aumenta nain 10 husi Hotel-Katuas.
Iha loron Sesta, 10 Abril 2020, rezultadu teste laboratóriu hatudu Timoroan ida positivu infetadu moras virus corona (COVID-19), no tuir fali iha loron Segunda 13 Abril 2020, hatudu tan Timoroan nain 2 positivu, no iha loron Tersa, 14 Abril 2020 hatudu Timoroan nain 2 tan positivu. No iha loron Kuarta horseik 15 Abril 2020, rezultadu teste hatudu timoroan nain 2 tan positivu ona.
Loron Kinta ohin 16 Abril 2020 rezista tan kazu pozitivu foun hamutuk nain 10 husi Hotel-Katuas. Nune’e, total kazu pozitivu iha loron ohin hamutuk ema nain 17 ona mesak Timoroan de’it.
