DILI (TOP) — Rezultadu fiskalizasaun membru Parlamentu Nasionál husi bankada Kmanék Haburas Unidade Timor Oan (KHUNTO) deputada Irene Gonzaga Sarmento deskobre klinika ida iha postu administrativu Bariki, munisipiu Manatuto durante tempu barak ona laiha ai-moruk, maibé osan aprova bai ha Ministériu Saúde nian durante ne’e boot loos.
“Iha ne’e, primeiru ha’u hakarak ko’alia kona-ba ai-moruk, tanba ha’u foin fila husi Postu Administrátivu Bariki, Munisípiu Manatuto. Ha’u hetan informasaun husi komunidade sira iha ne’ebá sira informa katak, ai-moruk agora iha stock laiha ona,” deputada, Irene Gonzaga Sarmento preokupa iha sesaun plenaria iha Parlamentu Nasionál, Segunda 13 Juñu 2022.
Deputada Irene hatutan, ai-moruk hanesan paracetamol, no ai-moruk sira seluk babain pasiente ba konsulta, isin-manas no kabun-moras dala-ruma sira ba konsulta maibé agora ai-moruk sira ne’e laiha ona.
“Pasiente sira ba konsulta iha klinika swasta sira maka foin bele hetan ai-moruk entaun komunidade sira hato’o horseik atu fó hatene ba Minsiteriu relevante atu haretok asuntu ida ne’e ho seriu tanba agora komesa udan provoka moras ba ita nia komunidade sira,” nia hateten.
Reprezenta povu iha PN ne’e akresenta, husu ba Ministériu relevante atu hare ba asuntu ida ne’e, sei bele karik koloka ona ai-moruk ba fatin sira ne’ebé ke presiza dunik ai-moruk.
“Tanba ita hare ba klinika sira ne’ebé ke iha ai-moruk sira komesa menus ba bebeik,” nia husu.
Iha fatin hanesan bankada Frente Revolusionáriu Timor Lorosa’e Independente (FRETILIN) deputada, Helena Martins Belo infroma iha semana kotuk minsitra saúde Odete Maria Freitas Belo dehan rekoñese katak ai-moruk laiha duni.
Nia hatutan, nia atu hatete kona-ba ai-moruk katak loos iha semana kotuk mós Ministra Saude (MS) Odete Maria Freitas Belo mai iha komisaun Parlamentu Nasionál.
“iha ne’ebá ami informa no minsitra saude mos rekonese katak sames maka haluha tiha atu sosa ai-moruk iha orsamentu 2021 ninian. Tanba ne’e, ami atu konvida diretor sames ne’e mai tanbasa maka bele haluha iha tiha orsamentu maibé nia haluha tiha.”
Nia hatutan, informasaun ne’e, señor Ministra saude (MS) Odete Maria Freitas Belo maka relata ba komunisaun iha semana kotuk liubá. Tanba ne’e maka diak liu komisaun maka bolu ou parlamentu nasionál bolu hodi mai justifika tanbasa maka haluha tiha fali atu sosa ai-moruk.
Iha fatin hanesan Bankada Union Demokrátiku Timorense (UDT) Deputadu Francisco David Xavier Carlos hateten, ultimamente rona lamentasoens barak iha klinika no dalaruma Hospitál Nasionál Guido Valadares (HNGV) ai-moruk laiha.
“Ministra Saúde labele fó sala diretor SAMES tanba nia maka lidera, nia maka tenke halo jestaun no halo monitorizasaun ba nia fatin sira ne’ebé esensial tebes atu aranja ai-moruk ba.”
Nia hatutan, tuir nia hanoin deputada Frente Revolusionáriu Timor Lorosa’e Independente (FRETILIN) Helena martins Belo dehan, Ministra Saúde informa ba komisaun iha semana kotuk ne’e ministra nia responsabilidade.
