DILI (TOP) — Diretór Forum Organizasaun Non-Govermentál Timor-Leste (FONGTIL) Daniel do Santos Carmo konsidera Prezidente Komisaun Nasionál ba Eleisaun (KNE), Alcino de Aroújo Baris laiha kapasidade, tanba uza razaun Covid-19, no serka sanitaria hodi falla halo preparasaun ba eleisaun prezidensiál ne’ebé sei akontese iha tinan 2022 nia klaran.
Prezidente Repúblika foun tenke simu posse iha loron 20 Maiu 2022.
“Deklarasaun prezidente CNE ne’e laiha fatin, deklarasaun ne’e demostra inkapasidade. CNE nia serbisu la’os atu haree ba Covid-19, moras Covid-19 ne’e Ministeriu Saúde maka rezolve kona-ba ida ne’e,” hateten director ezekutivu FONGTIL, Daniel dos Santos Carmo ba The Oe-Kusi Post (TOP) iha nia serbisu fatin, Kaikoli, Dili, Tersa 11 Maiu 2021.
“Se prezidente CNE kapasidade laiha, dehan de’it katak kapasidade laiha duni atu organiza eleisaun, labele dehan serka sanitaria no komfinamentu obrigatoriu maka implika ba preparasaun,” nia afirma.
Nia esplika, CNE ninia serbisu loloos maka halo fiskalizasaun ba eleisaun, no CNE la’os halo serbisu ba sira ne’ebé kontaktu ho populasaun, se maka halo serbisu kontaktu ho populasaun maka Sekretariadu Tékniku ba Administrasaun Eleitoral (STAE), tanba halo resenseamentu, eleitoral ba sidadaun sira ne’ebé maka tinan to’o ona, sira ne’ebé maka kartaun eleitoral a’at ka lakon sira ba halo ninia eleitoral ne’e dalaruma hasoru dezafiu.
Antes ne’e, Prezidente Komisaun Nasionál ba Eleisaun, Alcino Baris deklara, surtu Covid-19 maka impede nia serbisu durante ne’e.