DILI (TOP – Rezolusaun governu nian ne’ebé aprova husi reuniaun Konsellu Ministru sira iha loron 29 Abril liu ba desidi aplika konfinamentu domisiliáriu jerál ba sidadaun hotu iha munisipiu Dili, maibé faktu hatudu rezolusaun ne’e sai la vale tiha de’it ba ema nain 30 ne’ebé Polisia Nasionál Timor-Leste (PNTL) ka’er sira iha loron Tersa 04 Maiu 2021.
Iha loron 29 Abril 2021, Konsellu Ministrus aprova ona, ho alterasaun, projetu Rezolusaun Governu nian ba impozisaun konfinamentu domisiliáriu jerál ba ema hotu-hotu ne’ebé maka hela ka oras ne’e daudaun iha hela Munisípiu Dili, ne’ebé tenke hela iha sira nia uma ka iha sira nia alojamentu temporáriu, tuku 00:00 loron 30 fulan-abríl tinan 2021 no tuku 23:59 loron 13 fulan-maiu tinan 2021.
Rezolusaun governu nian kona-ba impozisaun konfinamentu domisiliáriu jerál mós katak, autoridade polisiál nian sira fiskaliza kumprimentu ba regra sira ne’ebé hatuur ona iha Rezolusaun Governu nian ne’e no aviza infratór sira katak se sira kontinua nafatin hodi la kumpre ba Rezolusaun ne’e, bele konsidera prátika ba krime dezobediénsia nian ida.
Autoridade polisiál sira sei komunika ba Ministériu Públiku identidade husi ema ne’ebé, hafoin avizu ne’ebé prevee iha fraze anteriór, kontinua la respeita regra sira ne’ebé prevee ona iha Rezolusaun Governu ne’e nian. Karik regra sira ne’ebé prevee iha Rezolusaun Governu ne’e nian ema sira husi rai-liur maka la respeita, autoridade polisiál sira sei komunika sira nia identidade ba Servisu Migrasaun.
Bandu atu transporte públiku sira hala’o movimentu iha área sira hotu iha Munisípiu Dili, liuliu, mikrolets, biskota, taksi sira no anguna sira. Bandu atu hala’o atividade selebrasaun relijioza ne’ebé implika ezisténsia ema halibur-malu. Ba efeitu Rezolusaun Governu nian ne’e, konsidera nu’udar ema halibur-malu mak ema liu husi na’in rua halibur malu menus husi metru rua entre sira, maibé ema nain 30 ne’ebé polisia ka’er no detein sira iha edifisiu Lotoria Populár Kuluhun, Dili livre ona.
Distributor Jogu Lataria Populár ema na’in-30 inklui feto ida ne’e, PNTL detein, bainhira hala’o hela atividade hatama osan no kupon jogu nian iha Kuluhun, Dili Tersa 04 Maiu 2021 oras tuku 16: 30 lokoraik.
Tuir informasaun balun ne’ebé The Oe-Kusi Post (TOP) asesu husi Polisia Nasionál ba Investigasaun Kriminal (PNSIK) katak, autor hirak ne’e, PNTL detein no konsege tula ho karreta rua ba edifisiu PNSIK hodi submeter ba prosesu investigasaun, no molok iha desijaun final husi investigasaun ne’e ikus mai liberta fali ona tuir karta intervensaun ida mai husi Ministru Turizmu, Komersiu no Industria, José Lucas do Carmo da Silva ho númeru referénsia 091/GM-MTCI/IV/2021, no 115/IGJ-MTCI/IV/2021 ne’ebé hasai iha loron 12 Abril 2021.
Konteudu husi karta ne’e katak, maske sidadaun baibain sira iha Dili laran tenke submeter ba konfinamentu domisiliariu jeral ka hela metin de’it iha uma, labele sai, maibé ba sira ne’ebé serbisu iha empreza jogu lotaria sira iha Liberdade tomak atu hala’o sira nia atividade. Importante maka mantein distansia sosial, fase liman bebeik ho sabaun molok tama ba fatin jogo lotaria nian.
Faktu hatudu, atividade lubuk ida maka oras ne’e paradu hela tanba de’it kumpri rezolusaun Konsellu Ministru nian kona-ba konfinamentu domisiliariu jeral. Rezolusaun governu nian ne’e mós bandu atu labele halibur ema liu nain 10, maibé saida maka akontese iha edifisiu jogu lotaria popular Kuluhun, Dili ne’e laiha distansia sosial, liu ema nain 10, maibé rezolusaun governu ne’e la vale ona, tanba maske polisia ka’er no konsege detein ema nain 30 mós ikus mai livre de’it ona.
Entretantu, ema sira ne’ebé polisia halo auto-stop ba sira iha edifisiu Akademia Polisia nia oin iha Komoro iha loron Tersa 04 Maiu 2021, obrigatoriu tenke tuir teste swab maka foin bele fila ba uma. Situasaun ne’e ikus mai hamosu dezintendimentu entre polisia ho sidadaun sira iha portaun Akademia Polisia nian.
