DILI (TOP) – Kondutor ka motorista taxi no mikrolet kuaje nain 35 ho sente triste tenke halai ba husu ai-han ba eis Primeiru-Ministru, Kay Rala Xanana Gusmão, tanba durante implementasaun Estadu emerjensia, serka sanitária no konfinamentu domisiliariu jeral iha munisipiu Dili lori dezastre boot tebes ba sira.
Portavoz motorista, Julio Soares Quintão hateten, sira nia moris durante ne’e maka lori ema nia kareta hetan osan maka kareta-nain (patraun) sira foin selu fali, maibé durante aplikasaun Estadu emerjensia ne’ebé taka buat hotu, bandu movimentu hotu maka hamosu dezastre boot ba sira.
Nia hatutan, tuir loloos bainhira governu aplika serka sanitária ne’e tenke prepara mós planu di’ak ida ba sidadaun sira hodi labele sofre ba hamlaha.
Julio dehan, oras ne’e sira laiha ona osan hodi sosa ai-han, tanba ne’e maka sira voluntaria ba rezidensia eis Primeiru-Ministru, Kay Rala Xanana Gusmão nian hodi husu ai-han ruma.
“Ami nia ezijensia mai iha Avo Xanana ne’e atu husu tulun mai ami nia nesesidade, liliu ba hahan, tanba ami araska loos,” hateten portavoz Julio ba jornalista sira iha Lecidere, Dili Kuarta 05 Maiu 2021.
Nia hatutan, sira laiha ona esperansa ba governu atual hodi rezolve sira nia situasaun difisil ne’e.
“Tanba ne’e maka ami mai iha fatin ne’e hodi husu tulun”.
Motorista sira ne’e, hakat ba rezidensia Kay Rala Xanana Gusmão nian iha loron Kuarta 05 Maiu 2021 iha oras dader to’o lorokraik, maibé seidauk hetan resposta ruma husi Xanana.
