Anar Band anima festa-nain nia tinan ba dala 47

DILI (TOP) – Familia ne’ebé selebra nia loron moris ba dala 47 iha loron Domingu liuba, sente animadu tebes ho múzika furak sira ne’ebé aprezenta husi grupu banda múzika Anar Banda (Banda Anar), maibé Polisia Nasionál Timor-Leste konsege hapara tiha atividade ksolok ne’e, tanba viola regra konfinamentu domisiliáriu jerál ne’ebé aprova tiha ona husi Konsellu Ministru sira iha loron 30 Abril 2021.

Tokador no Vokalista husi Anar Band, Ano Mintha hateten, bainhira familia ne’e ba husu sira, nia lakohi tanba konsiente katak durante period konfinamentu domisiliáriu jerál ne’e bandu atu halibur ema barak, maibé ikus mai simu pedidu ne’e tanba festa nain-garante katak buat hotu sei la’o di’ak hela, laiha problema ida.

“Ha’u hatan dehan di’ak maibé situasaun ne’e oinsa? kira-kira bele ka la'e, ita halo festa ne’e. Tanba serka sanitraria no estadu emerjensia komu festa na’in fó garantia katak laiha problema  siguransa buat sira ne’e hotu,” Ano Mintha esplika via kontaktu telemovél ba The Oe-Kusi Post, Tersa 4 Maiu 2021.

Nia hatutan, Banda muzika Anar Band ne’e fornese de’it ninia service maka toka hodi anima festa nain naran Clara ne’ebé selebra nia tinan ba dala 47 iha loron Domingu 02 Maiu 2021.

Tanba festa nain garante katak sei laiha buat ida, ikus mai Anar Band mós simu pedidu ne’e hodi ba toka iha Domingu kalan liuba iha Kolmera, Dili.

“Iha loron Domingu 02 Maiu 2021 ne’e, ha’u husu tuir ba parte familia iha seremonia katak buat hotu di’ak ka la’e, festa na’in ne’e hatan katak buat hotu la’o diak, ami koalia hotu ona ho ema boot sira,” Ano konta hikas nia konversa ho festa nain.

Nia hatutan, festa ne’e akumula ema besik nain 30 mesak familia Clara nian de’it, no festa la’o to’o klaran iha oras tuku 10 kalan, autoridade PNTL sira tam aba festa laran hodi konsege hapara tiha festa halo tinan ne’e, tanba viola rezolusaun governu nian kona-ba konfinamentu domisiliariu jeral ba rezidente sira iha munisipiu Dili inklui sira ne’ebé halo festa, no dansa iha Kolmera iha loron Domingu liuba.

“Iha Domingo kalan Anar Band toka mais-menus tuku 10 kalan, PNTL tama impede tiha, no husi ne’e kedas ami mós la toka ona”.

Nia hatutan, festa nain ne’e mós informa ba nia katak, simu ona notifikasaun husi Ministériu Públiku atu ba hato’o deklarasaun iha loron Kuarta 05 Maiu 2021.

Festa halo tinan iha Kolmera ne’e halo sidadaun sira kuaje hirus hotu, no kondena maka’as ba familia ne’ebé organiza festa ne’e.

Mosu akuzasaun barak iha plata forma media sosial katak festa nain ne’e iha relasaun familia ho Prezidente Parlamentu Nasionál (PPN), Aniceto Guterres, maibé nia klarifika iha nia konta Facebook ho naran PDr. Aniceto Longuinhos Guterres Lopes katak, durante implementasaun Estadu Emerjénsia no Serka Sanitária iha Dili no teritoriu nasionál, nia nunka organiza no partisipa seremónia/festa ruma. Informasaun ne’ebé espalla iha públiku katak Prezidente Parlamentu Nasionál partisipa festa ne’e kompletamente FALSU / HOAX !!!!!!!!!!!!.

Auto-defeza ne’ebé fó sai husi PPN, Aniceto Guterres nia gabinete konsidera

Públikasaun sidadaun ho konta Facebook Iskeru Firaku Sertimor ne’e iha tendénsia atu desakredita no defama Prezidente Parlamentu nia naran. Públikasaun informasaun hanesan ne’e intensionalmente atu lansa propaganda hodi konstroe persepsaun ne’ebé negativu iha públiku, kona-bá Prezidente Parlamentu Nasionál, Dr Aniceto Longuinhos Guterres Lopes. Tanbá ne’e ami hakarak esplika pontus hirak tuir mai:

  1. Públikasaun ne’e hatudu tendénsia desakredita no defama kargu orgaun soberánia ne’eb Aniceto Longuinhos Guterres Lopes assume;
  2. Karik iha duni festa ruma hanesan autór Iskeru Firaku Sertimor hatete, ne’e la’os Prezidente Parlamentu Dr. Aniceto nia responsabilidade, tanba Prezidente la-hatene no laihá ligasaun ho festa ne’e.
  3. Karik iha duni festa hanesan públikasaun ne’e hatete, husu ba autoridade polisiál kompetente foti medidas hasoru atus husi ema sira ne’ebé organiza no involve iha festa ne’e, tanba viola Lei no.7/2021, 28 Abril kona-bá Deklarasaun Estadu Emerjénsia, alínea c), artigu 4 ne’ebé hatete katak autoridades públikas kompetente sira bele impoen medidas ba hamenus risku kontájiu no halo medidas prevensaun no kombate epidemia, inklui limita ka proibe realizasaun reuniaun sira no manifestasaun ne’ebé halibur ema ho potensia transmite moras SARS-Cov-2, basa ne’e konstitui ona krime desobediénsia.
  4. Husu atu ema ida naran “Iskeru Firaku Sertimor” ne’ebé públika informasaun no temi Prezidente Parlamentu Asaltu Poder, tenki responsabiliza nia lia-fuan hirak ne’ebé nia hasai ba públiku.

Ohin kedas, Prezidente Parlamentu Nasionál Dr. Aniceto Longuinhos Guterres Lopes, halo mós keixa ba Komando Geral PNTL no Polísia Investigasaun Kriminál hodi foti medidas hasoru hahalok sira viola lei no ordem públika.

Entretantu, Iskeru Firaku Sertimor deklara iha nia konta Facebook katak, nia sei la nonok ba buat ne’ebé loos.

“Hau sei la nonok ba buat nebe laloos. Ha’u iha direito para atu kritika se de’it halo la tuir CRDTL haruka. Lei nee BALE ba timor oan hotu,” komenta Iskeru.

Iha loron 29 Abril 2021, Konsellu Ministrus aprova ona, ho alterasaun, projetu Rezolusaun Governu nian ba impozisaun konfinamentu domisiliáriu jerál ba ema hotu-hotu ne’ebé maka hela ka oras ne’e daudaun iha hela Munisípiu Dili, ne’ebé tenke hela iha sira nia uma ka iha sira nia alojamentu temporáriu, tuku 00:00 loron 30 fulan-abríl tinan 2021 no tuku 23:59 loron 13 fulan-maiu tinan 2021.

Rezolusaun governu nian kona-ba impozisaun konfinamentu domisiliáriu jerál mós katak, autoridade polisiál nian sira fiskaliza kumprimentu ba regra sira ne’ebé hatuur ona iha Rezolusaun Governu nian ne’e no aviza infratór sira katak se sira kontinua nafatin hodi la kumpre ba Rezolusaun ne’e, bele konsidera prátika ba krime dezobediénsia nian ida.

Autoridade polisiál sira sei komunika ba Ministériu Públiku identidade husi ema ne’ebé, hafoin avizu ne’ebé prevee iha fraze anteriór, kontinua la respeita regra sira ne’ebé prevee ona iha Rezolusaun Governu ne’e nian. Karik regra sira ne’ebé prevee iha Rezolusaun Governu ne’e nian ema sira husi rai-li’ur maka la respeita, autoridade polisiál sira sei komunika sira nia identidade ba Servisu Migrasaun.

Bandu atu transporte públiku sira hala’o movimentu iha área sira hotu iha Munisípiu Dili, liuliu, mikrolets, biskota, taksi sira no anguna sira. Bandu atu hala’o atividade selebrasaun relijioza ne’ebé implika ezisténsia ema halibur-malu. Ba efeitu Rezolusaun Governu nian ne’e, konsidera nu’udar ema halibur-malu  mak ema liu husi na’in rua halibur malu menus husi metru rua entre sira.

Marcelino Bata
Author: Marcelino BataEmail: Este endereço de email está sendo protegido de spambots. Você precisa do JavaScript ativado para vê-lo.

PUBLISIDADE