DILI (TOP) – Polisia Nasionál Timor-Leste halo auto-stop hodi obriga sidadaun sira ne’ebé halo movimentu iha estrada públiku tenke tuir teste swab hotu tuir rezolusaun governu nian maske rezolusaun governu nian ne’e la hatete spesifiku kona-ba kestaun ne’e.
Iha loron Tersa 04 Maiu 2021, Komandu Jerál Polisia Nasionál Timor-Leste (PNTL) liu husi Seksaun Mediku PNTL koopera ho Ekipa Pilar III Ministériu Saúde halo teste swab masal COVID-19 ba abitante sira ne’ebé dezobidiénsia kontra regra Serka Sanitaria iha kapitál Dili.
Desizaun ne’e Komandu Jerál PNTL no Ministériu Saúde halo ho intensaun atu identifikasaun sedu kondisaun saúde abitante sira nu’udar meius hodi prevene aan hosi peste letál COVID-19 no husu atu komunidade hapara movimentu hodi hela dei’t iha uma.
Iha prosesu pasarevista no obrigatoriu abitante sira tuir teste swab masal ne’ebé hala’o iha áreadores Centru Formasaun Polisia (CFP) Comoro, konsege hamosu dezentendimentu protesta hosi komunidade 100-liu no polisia, tanba la simu desizaun governu obriga teste swab.
Komunidade Alberto Nahareka lamenta, polisia haruka komunidade sira tama tiha áreadores Academia PNTL, maibé haruka fali ema balun fila no balun de’it tuir teste obrigatoriu.
“Regra saida maka haruka ami balun tama tiha tuir teste, agora balun haruka fila fali ne’e la justu,” nia proteste.
Abitante ne’e hamosu agresaun fiziku ho polisia hodi dudu malu atu loke purtaun PNTL, maibé la konsege, tanba PNTL blokea metin.
Iha fatin hanesan, Komunidade Suku Comoro, Daniel Vicente da Costa konsidera asaun polisia obriga komunidade ne’e ladún di’ak, tanba halibur ema sira iha fatin ne’ebé la seguru bele hamosu cluster foun.
“Ami la simu atu halo teste hanesan ne’e, tanba tuir loloos governu hakarak halo swab koordena ho ami nia xefe suku ida-idak halo teste iha nia suku no aldeia, la’ós mai obriga ami forma butuk fali iha ne’e,” dehan Daniel hodi proteste hasoru polisia.
Komunidade sira mós lamente, tanba ema balun halo ona teste swab ona iha sira nia suku, maibé kontinua tuir nafatin teste.
Komunidade lamente no konsidera asaun polisia ne’e hanesan deskrimiasaun kontra direitu povu nian.
“Haruka ami tama mai hanesan fali ami halo krimi,” komunidade sira protesta.
Durante haksesuk malu kuaze oras ida liu ne’e, Portavós Komandu Jerál PNTL, Superintendente Xefe, Arnaldo de Araújo no Segundu Komandante Akademia PNTL Komoro, Superintendente, Boavida Ribeiro konsege hakalma sitasaun hodi esplika regra implementa Serka Sanitaria iha kapitál Dili.
“Ami husu atu imi hotu tenki kumpri no intendente didi’ak saida maka hanaran konfinamentu domisioliariu husu atu ita hotu tuur hakmatek para evita moras,” dehan Boavida hodi hakalma situasaun.
Boavida konsidera asaun ne’ebé polisia halo hodi implementa regra Estadu Timor-Leste no Serka Sanitária.
“Saida mak ami polisia halo atu kumpre orden estadu atu ita hotu bele koopera malu,” nia alerta.
Portavós PNTL, Superintendente Xefe Arnaldo de Araújo dehan, bainhira halo teste swab ba komunidade sira pozitivu COVID-19, ekipa Ambulansia PNTL no Ministériu Saúde tenki lori kedas abitante sira ba fatin sentru izolamentu hodi hala’o tratamentu saúde.
“Teste swab ne’e obrigatoriu ba komunidade sira, balun koopera di’ak balun la koopera too mosu detentezimentu, no se sira ne’ebé teste pozitivu tenki tama ba kuarentena,” dehan Arnaldo.
PNTL sei kontinua halo operasaun nafatin iha kapitál Dili hodi husu komunidade ne’ebé la kumpre regra la’o movimentu iha kapitál Dili atu tuir teste hodi koopera ho desizaun estadu.
Entretatun, hafoin mosu tezentendimentu, ekipa mediku Pilar III no Ekipa Mediku PNTL kontinua halo teste swab ba abitante sira.
Abitante sira ne’ebé tuir ona teste, sira nia amostra sei lori ba halo teste iha Laboratoriu Nasionál.
Iha loron 29 Abril 2021, Konsellu Ministrus aprova ona, ho alterasaun, projetu Rezolusaun Governu nian ba impozisaun konfinamentu domisiliáriu jerál ba ema hotu-hotu ne’ebé maka hela ka oras ne’e daudaun iha hela Munisípiu Dili, ne’ebé tenke hela iha sira nia uma ka iha sira nia alojamentu temporáriu, tuku 00:00 loron 30 fulan-abríl tinan 2021 no tuku 23:59 loron 13 fulan-maiu tinan 2021.
Rezolusaun governu nian kona-ba impozisaun konfinamentu domisiliáriu jerál mós katak, autoridade polisiál nian sira fiskaliza kumprimentu ba regra sira ne’ebé hatuur ona iha Rezolusaun Governu nian ne’e no aviza infratór sira katak se sira kontinua nafatin hodi la kumpre ba Rezolusaun ne’e, bele konsidera prátika ba krime dezobediénsia nian ida. Autoridade polisiál sira sei komunika ba Ministériu Públiku identidade husi ema ne’ebé, hafoin avizu ne’ebé prevee iha fraze anteriór, kontinua la respeita regra sira ne’ebé prevee ona iha Rezolusaun Governu ne’e nian. Karik regra sira ne’ebé prevee iha Rezolusaun Governu ne’e nian ema sira husi rai-li’ur maka la respeita, autoridade polisiál sira sei komunika sira nia identidade ba Servisu Migrasaun.
Bandu atu transporte públiku sira hala’o movimentu iha área sira hotu iha Munisípiu Dili, liuliu, mikrolets, biskota, taksi sira no anguna sira. Bandu atu hala’o atividade selebrasaun relijioza ne’ebé implika ezisténsia ema halibur-malu. Ba efeitu Rezolusaun Governu nian ne’e, konsidera nu’udar ema halibur-malu mak ema liu husi na’in rua halibur malu menus husi metru rua entre sira.
