DILI (TOP) – Portavoz Komandu Jeral Polisia Nasionál Timor-Leste (PNTL), Superintendente Xefe Arnaldo de Araújo katak maske seidauk hatene kona-ba festa illegal ne’ebé akontese durante periodu foin lalais akontese iha Kolmera, Dili, maibé nia dehan sei buka tuir kona-ba festa illegal ne’e.
Iha loron 29 Abril 2021, Konsellu Ministrus aprova ona, ho alterasaun, projetu Rezolusaun Governu nian ba impozisaun konfinamentu domisiliáriu jerál ba ema hotu-hotu ne’ebé maka hela ka oras ne’e daudaun iha hela Munisípiu Dili, ne’ebé tenke hela iha sira nia uma ka iha sira nia alojamentu temporáriu, tuku 00:00 loron 30 fulan-abríl tinan 2021 no tuku 23:59 loron 13 fulan-maiu tinan 2021.
Bazeia ba faktu sira ne’ebé akontese iha terenu hatudu, projetu rezolusaun governu nian ne’e iha tendensia vale de’it ba povu ki’ik sira basa deskonfia ema boot balun nia familia sira realiza festa halo tinan ida iha área Kolmera, Dili.
Komandante Arnaldo katak, to’o oras ne’e nia seidauk hatene kona-ba festa illegal ne’e, maibé promete ona sei buka tuir hodi hatene.
“Di’ak ha’u hanoin orsida ha’u sei buka ida ne’e, aban fali maka ko’alia fali iha konferénsia,” hateten ba jornalista sira iha Akademia Polisia, Komoro, Dili Tersa 04 Maiu 2021.
Rezolusaun governu nian kona-ba impozisaun konfinamentu domisiliáriu jerál mós katak, autoridade polisiál nian sira fiskaliza kumprimentu ba regra sira ne’ebé hatuur ona iha Rezolusaun Governu nian ne’e no aviza infratór sira katak se sira kontinua nafatin hodi la kumpre ba Rezolusaun ne’e, bele konsidera prátika ba krime dezobediénsia nian ida. Autoridade polisiál sira sei komunika ba Ministériu Públiku identidade husi ema ne’ebé, hafoin avizu ne’ebé prevee iha fraze anteriór, kontinua la respeita regra sira ne’ebé prevee ona iha Rezolusaun Governu ne’e nian. Karik regra sira ne’ebé prevee iha Rezolusaun Governu ne’e nian ema sira husi rai-li’ur maka la respeita, autoridade polisiál sira sei komunika sira nia identidade ba Servisu Migrasaun.
Bandu atu transporte públiku sira hala’o movimentu iha área sira hotu iha Munisípiu Dili, liuliu, mikrolets, biskota, taksi sira no anguna sira. Bandu atu hala’o atividade selebrasaun relijioza ne’ebé implika ezisténsia ema halibur-malu. Ba efeitu Rezolusaun Governu nian ne’e, konsidera nu’udar ema halibur-malu mak ema liu husi na’in rua halibur malu menus husi metru rua entre sira.
Festa halo tinan iha Kolmera foin lalais ne’e provoka sidadaun sira iha mundu virtual no mundu real sente hirus tebes kona-ba lala’ok implementasaun rezolusaun governu nian ne’ebé kro’at de’it ba povu ki’ik sira, maibé la kro’at ba ema boot sira inklui sira nia familia sira iha rai-laran.
