Governu rende ba Xanana no familia matebian

DILI (TOP) – Governu liu husi Sentru Integradu ba Jestaun Krize Covid-19 (SIJK) ikus mai rende hodi entrega tiha ona mate-isin Armindo Borges ba eis Primeiru-Ministru, Kay Rala Xanana Gusmão, no familia matebian hodi halo’ot tuir sira nia lisan.

Durante loron 3 mosu disputa ba mate-isin entre governu ho familia matebian ne’ebé hetan suporta maka’as husi Xanana, maibé ikus mai SIJK rende tiha hodi entrega ona mate-isin ne’e ba parte familia hodi halo’ot iha semitériu públiku, la’os hakoi iha Metinaro.

Lourdes de Jesus nu’udar oan-feto matebian Armindo Borges sente triste no kontente. Triste, tanba maske nia aman mate ho moras stroke mós governu tenke rai fali mate-isin ne’e durante kalan 4 iha fatin izolamentu iha Sentru Saúde Vera Cruz, Dili.

“Ha’u sente kontente itoan, tanba governu entrega ona mate-isin ne’e mai ami, maibé triste maka barak liu, tanba tenke hein loron balun nia laran maka foin hetan fali mate-isin ne’e,” hateten Lourdes ba The Oe-Kusi Post (TOP) iha fatin izolamentu Vera Cruz, Dili Kinta 15 Abril 2021.

Iha fatin hanesan, eis Primeiru-Ministru, Kay Rala Xanana Gusmão katak, asaun sira durante loron hirak nia laran ne’e, la’os atu buka se maka manan, no se maka lakon, maibé atu hadia de’it buat naksalak balun iha prosesu kombate Covid-19 iha rai-laran.

Matebian Armindo husi munisipiu Ermera, maibé durante ne’e hela iha Komoro, no nia sofre nanis ona moras stroke.

Familia sira haktuir katak, matebian foin maka hetan atakasaun iha loron Domingu lorokraik, nune’e sira ba bolu ambulansia iha Sentru Saúde Komoro hodi lori ba Hospital Nasionál Guido Valadares (HNGV) atu konsulta. To’o sala emerjensia iha horas tuku 7 kalan, no médiku sira mós imediata halo Swab Test ho nia durasaun minute 15 fó sai ona rezultadu katak, matebian mós sofre moras Covid-19, maibé familia la simu rezultadu ne’e basa matebian ne’e hetan atakasaun stroke maka lori ba HNGV atu konsulta, la’os sofre moras Covid-19.

SIJK entrega mate-isin ne’e ba familia sira iha loron Kinta 15 Abril 2021 iha oras meudia. Parte ne’ebé entrega mate-isin ne’e maka Diretur Ezekutivu SIJK, Brigadeiru Jeneral Aluc Miranda Descartes, akompaña husi Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo ho sira seluk tan.

Molok hakat ba semitériu, sira lori mate-isin ne’e ba uma hodi familia no oan sira halo presta omenajen ba dala ikus nian molok ba hakoi iha semitériu públiku Kamalhut-Manleu, Dili. No, Amo Angêlo Salsinha maka dirije reza no fó bensaun ba rai-kuak ne’e.

Maske Armindo Borges (47) mate ho moras stroke, maibé nafatin halo’ot tuir padraun Organizasaun Mundial ba Saúde nian, tanba mate-isin ne’e rai kleur iha fatin izolamentu Vera Cruz, no iha prosesu funeral kumpri nafatin distansia sosial.

Ho prosesu entrega mate-isin ne’e, Xanana ho familia sira sei la okupa ona fatin izolamentu Vera Cruz, no ida-idak sei ba toba ona iha sira nia uma.

Padraun OMS nian hatete klaru ona katak, bainhira atu hakoi vitima Covid-19 ida tenke respeita ema nia dignidade, nune’e Primeiru-Ministru, Taur Matan Ruak hato’o deskulpa ba familia matebian ne’ebé governu desidi hakoi ketak iha Metinaro, no nunka permite familia sira hodi halo presta omenajen.

The Oekusi Post
Author: The Oekusi PostWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
www.OeKusiPost.com nu’udar plataforma media online iha Oe-Kusi Ambeno, Timor-Leste ne’ebé aprezenta notísia iha área oioin iha teritóriu nasionál. Rua. Numbei, Oe-Kusi Ambeno Mobile: +670 7723 4114 Email: info (at) OeKusiPost.com

PUBLISIDADE