DILI (TOP) – Ministra Saúde (MS), Odete Maria Freitas Belo bosok tiha ona eis Primeiru-Ministru, Kay Rala Xanana Gusmão kona-ba kazu matebian Armindo Borges ne’ebé rai hela iha fatin izolamentu Vera Cruz durante kalan 4 ona.
Iha loron Kuarta 14 Abril 2021 oras tuku 9 dadersan, Ministra Odete hakat ba hare mate-isin Armindo Borges, no vizita mós pasiente positivu Covid-19 iha fatin izolamentu Vera Cruz nian, no hafoin sai husi vizita mate-isin ne’e, Ministra husi partidu FRETILIN ne’e konfesa ho fuan-laran no kabun tomak ba eis Komandante ein Xefe das FALINTIL, Kay Rala Xanana Gusmão ho familia matebian sira katak, Konsellu Ministru sira maka sei desidi kona-ba kazu mate-isin Armindo nian.
“Ha’u fila, ha’u hare saida maka Avo Nana ko’alia,” Ministra Odete promete ba Xanana iha fatin izolamentu iha Sentru Saúde Vera Cruz, Dili Kuarta 14 Abril 2021.
Liu tiha ida ne’e, governante ne’ebé mai husi munisipiu Baukau ne’e afirma tan, Konsellu Ministru sira maka sei desidi kona-ba kestaun ne’e.
“Desijaun iha ema boot, ba iha Konsellu Ministru ne’eba, ba hare,” hateten Odete molok sa’e ba kareta governu ne’ebé sosa husi povu nia kosar ben rasik.
Promesa no afirmasaun governante FRETILIN ne’e kontraria ho deklarasaun governante husi Partidu Libertasaun Popular (PLP) nian.
Vise-Prezidente Partidu Libertasaun Popular (PLP) atual Ministru Prezidénsia Konsellu Ministrus, Fidelis Manuel Leite Magalhães katak atu foti desijaun kona-ba assuntu ne’e la’os kabe ba kompetensia Konsellu Ministru (KM) sira nian, maibé Sentru Integradu ba Jestaun Krize (SIJK) maka sei desidi, tanba KM sira ne’e desidi de’it ba assuntu politiku sira, la’os atu desidi fali assuntu tekniku nian.
“Ba dala uluk, kona-ba assuntu ida ne’e, ne’e assuntu tékniku kabe ba SIJK maka halo desijaun sira ne’ebe estabelese ona. Se maka pronunsia kona-ba assuntu spesifiku ida ne’e maka Komandante Operasional SIJK atual Primeiru-Ministru,” Ministru Fidelis hateten assuntu ne’e liu husi konferesia ba imprensa hafoin remata reuniaun Konsellu Ministru sira iha loron Kuarta 14 Abril 2021 ne’ebé remata iha oras tuku 10 kalan iha Palácio Governu.
Governante mai husi munisipiu Kuda Ulun (Bobonaro) ne’e repete tan katak, Konsellu Ministru ne’e laiha kompetensia atu foti desijaun kona-ba atu entrega mate-isin Armindo Borges ba governu ka familia, tanba tuir alumni Universidade Harvard ne’e katak Konsellu Ministru ne’e nu’udar orgaun kolejial ne’ebé la’os atu ba desidi fali mate-isin ne’e.
“Primeiru-Ministru maka iha kompetensia atu fo informasaun kona-ba kestaun ne’e. Ida ne’e la’os kompetensia Konsellu Ministru nian. Konsellu Ministru ne’e la halo desijaun ba assuntu ho natureza teknika. Konsellu Ministru sira so halo de’it desijaun politika,” esplika eis Xefe Kaza sivil ne’e.
Tanba seidauk iha desijaun definitivu ruma husi parte governu maka rezulta Kay Rala Xanana Gusmão ho familia matebian durante kalan 3 ona tenke toba de'it iha estrada Vera Cruz hodi hein mate-isin ne'e.
