DILI (TOP) – Bankada CNRT iha Parlamentu Nasionál kestiona maka’as kona-ba saldo da Conta do Tesouro ne’ebé oras ne’e hela de’it miliaun $59,7.
Deputada CNRT, Carmelita Caetano Moniz esplika, hare’e ba Portal Transparensia ezekusaun atinzi ona 19.5% reprezenta montante osan hamutuk $465,318,411.63 de dolares husi OJE 2021 total hamutuk $1,895,000,000.00 de dolares
Nia dehan, iha dia 05 de janeiro 2021 tuir Ministru Finansas de Faktu Rui Gomes dehan, Saldo Tezouro (líquidez-likuiditas) total osan hamutuk $325,000,000.00 de dolares mak sei iha saldo hodi bele selu nesesidades kurtu-prazu nian, inklui ita-nia deve sira. No, iha fali 23 de fevereiro 2021, Banco Central Timor-Leste katak tranfere ona osan Fundo Petrolíferu hamutuk $200,000,000 de dolares.
“Total osan loloos hahú husi fulan-janeiru to’o março 2021 depois konta ho levantamentu iha tinan 2021 hamutuk $525,000,000, maibé ita hare’e husi ezekusaun to’o loron 17 de março gasta ona osan hamutuk $465,318,411.63 de dolares. Signifika ita nia líquidez (saldo agora) hela de’it $59,681,588.37 (Miliaun $59,7),” kestiona deputada Carmelita hateten ba jornalista sira iha Parlamentu Nasionál, Dili Kuarta 17 Marsu 2021.
“Seraké iha fulan-março 2021 ida ne’e seidauk iha nesesidade atu halo levantamentu foun ba Fundo Petrolífero ba OJE 2021? Tanba ita nia saldo agora hela de’it Miliaun $ Miliaun $59,7 de dolares”.
Deputada CNRT husi munisipiu Kovalima ne’e esplika, konforme prática diak contabilísticas internacionais no governu Timor-Leste uluk kedan implementa ida ne’e, orsamentu transita husi tinan passado nian tenke rai $200 milhões ba iha Saldo da Conta do Tesouro hodi asegura rezerva iha próxima ano nian. Osan ne’e saldo baziku ba ita nia kaixa tezouro tenke iha Miliaun $200 de dolares.
Nune’e, se osan menus ona husi Miliaun $200, Governu tenke husi Banco Central atu transfere osan husi Fundo Petrolífero ba iha kaixa tezouro nian.
Maske nune’e, tantu hahu husi Primeiru-Ministru, Taur Matan Ruak ho Ministru Finansas, Rui Gomes durante ne’e sempre deklara ba públiku atu labele preokupa demais kona-ba osan ne’e, tanba tuir governante nain-rua ne’e katak osan iha hela sa.
