DILI (TOP) — Estadu emerjensia iha Timor-Leste tama ona ba dala sia ho nia implementasaun sira sempre izola Rejiaun Administrativu Espesial Oe-Kusi Ambeno (RAEOA) no postu Atauro, maibé deputadu nain tolu (3) kedas husi Oe-Kusi Ambeno “nunka” levanta kestaun ne’e. Deputadu husi fatin seluk maka preokupa kona-ba assuntu ne’e.
Deputadu nain 3 ne’ebé husi Oe-Kusi Ambeno maka nain rua husi partidu FRETILIN no nain ida husi partidu CNRT.
Izola fatin rua ne’e liu husi hapara total movimentu transporte maritima, maibé deputadu Partidu Demokrátiku (PD) Mariano Asanami Sabino hahu la konkorda ona ho modelu implementasaun Estadu emerjensia hanesan ne’e, tanba tuir eis Ministru Agrikultura no Peskas ne’e katak RAEOA ho illa Atauro ne’e nu’udar parte ida husi teritóriu Timor-Leste nian, la’os nasaun ketak ida. Tanba ne’e, tuir deputadu husi Ponta Leste ne’e katak prosesu implementasaun Estadu emerjensia mós tenke balansu ho munisipiu sira seluk.
“Ha’u hanoin ba oin ita tenke rigorozu ba fronteira sira, maibé Oe-Kusi Ambeno ne’e rai-ketan ida ne’ebé tama teritoriu Timor-Leste. Ita tenke fasilita nafatin se la’e ita izola nafatin Oe-Kusi Ambeno no Atauro,” deputadu Asanami levanta kestaun ne’e iha plenaria Parlamentu Nasionál iha loron Segunda 18 Janeiru 2021.
Nia hatutan, governu hapara ona ro-ahi Berlin Nakroma no SUCCESS ba rai-ketan Oe-Kusi Ambeno mai Dili, tanba de’it razaun moras Covid-19.
“Maibé iha Oe-Kusi oan balun mai kura iha hospital depois mate ne’ebé governu fó atensaun oinsa ba mate isin ne’e bele fila-fali ba Oe-Kusi Ambeno atu hakoi iha rai-ketan Oe-Kusi Ambeno. Governu tenke halo politika di’ak ba Oe-Kusi Ambeno no Atauro, maibé governu labele izola tiha sira,” sujere Asanami.
Nia esplika, governu tenke halo jestaun ba hasoru moras ida ne’e.
“Se governu la halo jestaun, ne’e problema ba koneksaun sosial, no mós ba koezaun sosial iha Timor-Leste”.
Entretantu Ministru Asuntu Parlamentar no Komunikasaun Sosial (MAPKOMS) Fransisco Jeronimo hatan katak, transporte maritima ba RAEOA no Atauro ativu fali ona.
“Agora trasporte maritima Oe-Kusi Ambeno sei la’o normal fali hanesan baibain, maibé nafatin husu ba pasajeiru sira katak ro-ahi tula mós ho kuidadu tenke iha nafatin distansiamentu sosial, fase liman no uza maskara ne’ebé sei kontinua nafatin,” esplika Ministru Francisco.
Governante husi partidu FRETILIN ne’e hatutan, iha Sesta liuba governu liu husi reuniaun Konsellu Ministru estra-ordinariu halo tiha ona desizaun hasai tiha ona blokeia movimentu transporte maritima husi Dili ba RAEOA no Atauro.
“Agora iha RAEOA hala’o ona atividade normal hanesan baibain tanba kazu Covid-19 nain tolu iha ne’ebá negativu ona, no pasiente na’in tolu ne’e fila hotu ona ba iha sira nia uma ona,” nia afirma.
