DILI (TOP) – Bankada Consellu Nasionál Rekonstrusaun Timor-Leste (CNRT) no Bankada Klibur Haburas Unidade Timor Oan (KHUNTO) kestiona Ministru Obrás Públikas (MOP) Salvador Eugenio Pires ne’ebé “tebe sai” funsionáriu nain 5 iha EDTL, tanba de’it ezije sira nia direitu.
"Ita haree funsionáriu tékniku EDTL nain 5 iha Hera ne'ebé Ministru Obras Públika, Salvador Eugenio Pires, hasai tiha hosi sira nia serbisu, ita haree ida ne'e ladun di’ak. Funsionáriu nain 5 ne'e serbisu iha ne'ebá diresaun tempu kleur ona, balun tinan 8, balun tinan 5, tinan 3, ida ne'e presiza haree, atu motiva maluk Timoroan sira la’os ho hahalok hasai ida ne'e la di’ak," hateten deputadu Luis Roberto iha sesaun Plenária Parlamentu Nasionál, Tersa 21 Jullu 2020.
"Kuandu hasai ne'e signifika katak ita viola ita nia funsionáriu sira, tanba ne'e mak liu hosi Bankada KHUNTO simu informasaun husi ita-nia maluk sira ne'ebé Ministru Salvador hasai ne'e," nia afirma.
Deputadu husi partidu KHUNTO ne’e husu ba Ministru Salvador atu bolu fila- fali funsionáriu na'in 5 ne'e para ko’alia didi’ak ho sira bele re-ativa serbisu nu’udar funsionáriu EDTL hanesan bai-bain, tanba sira serbisu tinan barak ona.
Deputadu ne’e aprezenta rajaun hasai funsionáriu nain 5 ne’e, tanba de’it sira ezije sira nia direitu ba liña frente Covid-19 nian.
"Tanba ne'e bankada KHUNTO hanesan bankada governu, maibé haree, hakarak atu ko’alia buat ne'ebé loos ba loos, no sala ba sala duni, tanba ne'e ha'u fó hatene ba Ministru atu bele hadia problema ida ne'e, labele hatudu hahalok ida ne'ebé buka hasai de’it ne'e labele, kuandu laiha dalan mak atu rezolve buka mak atu hasai de’it bainhira mak atu halo dezenvolvimentu iha rai ida ne'e”.
Funsionáriu tékniku EDTL nain 5 ne’ebé hasai ona mak hanesan João Batista Verdial, Nelio Asuncão de Jesus, Junito Estevão Araújo Reis, Januariu Ivan Dias Marcal no Elo King Benay da Costa Margues. Sira nain 5 ne'e, serbisu nu’udar operador no halo manutensaun ba operador EDTL sira iha Hera.
Kestaun hanesan mós kestiona husi deputadu CNRT, Patrocinio Fernandes katak, hasai sira nain 5 ne’e, tanba de’it sira espresa sira nia hanoin kona-ba sira-nia direitu.
"Ministru ninia orientasaun ba kompañia Wartsila atu hasai funsionáriu nain 5 tanba de’it sira hato'o sira-nia hanoin, espresa sira-nia hanoin kona-ba direitu bainhira sira serbisu iha periodu estadu emerjénsia, sira hanoin sira mós iha direitu atu hetan hotu ba subsidiu," informa deputadu Patrocinio.
Nia hatutan, funsionáriu nain 5 ne'e mós husu ona deskulpa, maibé iha influensia nafatin para kompañia bele hasai tiha funsionáriu nain 5 ne'e.
"Ha’u hakarak hatete ministru Salavador durante ninia mandatu ne'e kria mak problema d’eit, buat ida nia halo ne'e estudu hela de’it, maibé problema barak mak nia halo," akuza deputadu Patrocinio.
Entertantu Ministru Asunto Parlamentar no Komunikasaun Sosial (MAPKOMS), Fransisco Jeronimo hatan ba kestaun ne'e, nia toma nota no rejista ona hodi hato’o ba MOP bainhira partisipa iha reuniaun Konsellu Ministru nian.
The Oe-Kusi Post (TOP) tenta ona konfirma assuntu ne’e ba gabinete media MOP nian, maibé seidauk hetan komentáriu ruma, no iha posbilidade katak MOP sei klarifika bainhira partisipa iha reuniaun Konselllu Ministru sira iha loron Kuarta 22 Jullu 2020.
