DILI (TOP) — Xefe Bankada Kmanek Haburas Unidade Nasionál Timor Oan (KHUNTO), deputada Olinda Guterres husu ba Primeiru Ministru (PM), Taur Matan Ruak atu ezonera lalais Prezidente Administrasaun Portu Timor-Leste, Institutu Públiku (APORTIL, I.P), Lamartinho de Oliveira liga ho atividade kobransa illegal iha portu Dili.
Deputada Olinda hatutan, rajaun husi PM Taur atu ezonera lalais Lamartinho, tanba nia simu informasaun hela de’it husi komunidade sira kona-ba atividade kobransa illegal iha APROTIL durante ne’e, maibé Prezidente APORTIL, Lamartinho rejeita kedas informasaun husi deputada Olinda hodi ezije deputada husi partidu KHUNTO ne’e tenke aprezenta evidensia forte ba nia mak foin bele husu ezonerasaun.
“Tanba de’it ema ida maka halo sala ema sira iha partidu KHUNTO ne’e, bele halo sira nia naran fo’er hotu nia naran tanba ne’e husu liu-liu ba Primeiru Ministru ezonera ami nia ema ne’ebé mak asume dadauk prezidente APORTIL,” hateten deputada Olinda iha plenaria Parlamentu Nasionál, Tersa 04 Outubru 2022.
“Ha’u hakarak sujere ba Primeiru Ministru (PM), vise Primeira Ministra no mos Ministru Transporte no Telekomunikasaun urjente halo ezonerasaun ba ami nia ema ne’ebé mak asume kargu nu’udar prezidente APORTIL ne’e ha’u rasik maka ko’alia tanba ema KHUNTO nian kaundu halo sala ha’u iha direitu tomak husu ezonera urjente,” deputada Olinda ezije.
Hatan kona-ba kestaun ne’e, Prezidente Administrasaun Portu Timor-Leste, Institutu Públiku (APORTIL, I.P), Lamartinho de Oliveira rejeita maka’as informasaun husi deputada Olinda kona-ba kobransa illegal iha APORTIL durante ne’e.
“Kobransa saida mak ne’e, haruka deputada Olinda Guterres lori faktus mai. Se karik ha’u halo kobransa illegal lori faktu sira mai sa? Ha’u halo kobransa iha ne’ebé, halo kobransa illegal iha sé no horbainhira?,” Lamartinho husu fali deputada Olinda hodi aprezenta evidensia kona-ba nia akuzasaun ne’e.
Prezidente Lamartinho hatutan, nia kobra duni taxa ba estadu, la’os halo kobransa ba nia bolsu rasik.
“Kobransa ida ne’ebé haka’as ema atu selu ba taxa ne’e ha’u halo tanba ne’e ha’u nia kna’ar maibé, atu tau iha ha’u nia bolsu ne’e la’os ha’u nia knar. Iha politika domina ita halo buat sira ne’e mas tanba hau nia moris ne’e hau nunka tau ema nia osan iha hau nia bolsu laran ida koalia kona-ba taxa husi ajensia sira ne’e mai la selu taxa ne’e hau koalia no hau hakaas sira para selu taxa ba kofre estadu,” Lamartinho esplika.
“KHUNTO sira hakarak mai kobra ha’u mak ha’u lakohi fó ba ne’e mak sira hakarak halo hanesan ne’e karik? Ita iha ne’e estadu nia osan ita foti fali estadu nia osan fó fali ba partidu ne’e, hare tok lei númeru 8 kona-ba lei finansiamentu ba parte politika nian tanba ida ne’e kontraditoria ho lei ne’e,” nia hatutan.
