DILI (TOP) — Prezidente partidu Congresso Nasionál Reconstrução Timorense (CNRT) Kay Rala Xanana Gusmão apela ba povu tomak hakmatek labele provoka malu tanba demokrásia hili husi povu.
“Ha’u nia apelu ba povu tomak atu hakmatek labele provoka malu, ha’u husu boot ba grupus oi-oin ne’ebé ha’u rona dehan katak, forma iha ne’e forma iha ne’ebá, favor ida hakmatek ba lalika estraga imi nia aan rasik, lalika estraga ema seluk hakmatek ba, ho esperansa katak loron seluk kala imi nian sé maka lakon, lakon ne’e demokrasia povu maka hili,” Xanana Gusmão hateten lia hirak ne’e, hafoin sai husi sala sentru votasaun iha Balibar, Postu Adminsitrativu Vera-Crus, Munisipiu Dili, Tersa 19 Abril 2022.
Komandante em Xefe das FALINTIL ne’e husu ba povu tomak iha ra-laran tenke hakmatek hodi krize ne’ebé akontese ona iha tinan 2006-2007 labele akontese tan.
“Hanoin itoan ba maluk sira seluk hanoin itoan ba imi nia aan rasik mós ne’ebé rona katak buat sira ne’e prepara hela hau husu boot, ha’u apelu boot teb-tebes haraik aan rei tan sira nia ain hotu para labele bo’ok situasaun labele estraga povu nia moris,” Xanana hatutan.
Xanana preparadu simu derrota
Xanana hatutan, oras ne’e nia prontu no preparadu atu simu rezultadu eleisaun ne’e kuandu ninia kandidatura ne’e mak lakon iha eleisaun prezidensial ne’e.
“Sei derota pasiensia estadu de direitu demokratiku ne’e katak demokrasia ne’e iha povu nia liman ita hotu tenke respeita no kontribui husu deit ba povu tomak ba grupu sira hotu hotu labele provoka situasaun,” Xanana hateten.
Xanana dehan, kandidatu José Manuel Ramos Horta maka manan esperansa ba Partidu Congresso Nasionál Reconstrução Timorense (CNRT) ninia kandidatu katak nia kandidatu sei manan tiha maka hakarak hotu hakarak halo tenke halo.
“Ita tinan 20 ukun aan tenke hatudu katak ita nia matoridade politika iha situasaun oi-oin deit iha situasaun difisil iha situasaun fasil más iha situasaun hanesan ne’e labele hatudu inmatoridade hodi ameasa. Tanba primeira volta iha kontajen iha Becora no Fomentu ema kaer kilat ameasa, rona katak, grupu grupus,” Xanana hateten.
“Ne’e duni husu ba PNTL no husu ba F-FDTL no husu ba Instituisaun sira hotu hotu. atu apela ba paz, apela ba dame para labele akontese saida maka ladiak mai Timor Leste”.
Prezidente partidu Congresso Nasionál Reconstrução Timorense (CNRT) Kay Rala Xanana Gusmão nia hatutan, Timor Leste infrenta hela krize boot ida tuir nia hanoin.
“Ita infrenta hela krize boot ida iha hau nia leten. Agora ita hakarak tan krize boot iha leten tun fali mai iha povu nia leet hodi povu maka terus fali".
“Ha’u halo apelu boot ida organizasoens hotu hotu hau rona katak iha grupu sira oi-oin. Hau husu boot F20 no seluk tan atu hakmatek, respeita povu nia desizaun ne’e para labele akontese tan iha povu nia leet,” nia hakotu.
