DILI (TOP) — Komandante em Xefe das FALINTIL atual Prezidente partidu CNRT Kay Rala Xanana Gusmão hateten, to’o oras ne’e seidauk simu no hatene karta husi Sekretariu Jeral Partidu FRETILIN Mari Bim Amude Alkatiri nian, no Xanana afirma tan laiha tempu atu dada-lia ho ema matenek boot sira iha rai-laran, tanba nia nivel edukasaun ne’e sekundariu de’it.
“Ha’u SMA oan ida, simples SMA oan ida, kuitadu ha’u ba ko’alia fali ho doutor, mesak doutor, ha’u husu diskulpa barak ne’e la’os tanba lakohi, ha’u mak sente aan. Sente aan tanba ha’u nia nivel la to’o ba iha doutor boot sira ne’e ho tan jeneral sira ne’e, ha’u ne’e kuitadu,” Xanana Gusmão hateten lia hirak ne’e ba jornalista sira hafoin sai husi sala sentru votasaun Balibar, Postu Adminsitrativu Vera-Cruz, Munisipiu Dili, Tersa 19 Abril 2022.
“Ha’u dehan tiha ona katak, ha’u ne’e kuitadu ha’u atu ba ko’alia ho jeneral ha’u ne’e guerileiru oan ida ida, susuk mós ha’u la hatene oho, lekirauk mós ha’u la hatene oho, ha’u ba ko’alia fali ida ne’e ha’u fali ho jeneral ida ne’e ha’u mo’e fali,” Xanana esplika hodi hatudu nia pozisaun seidauk simu karta husi Alkatiri.
Lider krismatiku Kay Rala Xanana Gusmão ne’e esplika, “imi rona tiha ona lori ona ba partidu, partidu la’os ha’u maka manda partidu, partidu tuir duni ninia orientasaun.
Iha parte seluk, kandidatu Prezidente Repúblika José Manuel Ramos-Horta hateten, nia rona no nia funsionariu sira simu duni ona karta Alkatiri nian, maibé sei kontinua rai hela iha nia serbisu fatin iha Farol, no seidauk loke no le’e konteudu karta ne’e rasik, tanba durante Horta okupadu tebes ho serbisu importante balun ne’ebé persija nia atensaun no ejernia hodi finaliza.
“Ha’u seidauk le’e, ha’u rona ona maibé ha’u seidauk le’e, ha’u simu más iha hela office tanba agora ha’u preokupasaun ba eleisaun segunda ronde, ha’u seidauk le’e. Ha’u sempre prontu ba dialogu karta ne’e la’os diriji ida ba ha’u, maibé diriji ida ba maun boot Xanana,” hateten Horta ba jornalista sira iha sentru votasaun Meti-Aut, Postu Administrativu Cristo Rei, Dili, Tersa, 19 Marsu 2022.
Entretantu, karta Alkatiri nian ne’ebé oras ne’e espalla lemo-lemo iha plata forma media sosial katak, Serketariu Jeral Partidu FRETILIN ne’e hakruk duni ona ba Xanana, no husu ba Xanana atu tur hamutuk ho nia hodi ko’alia kona-ba balansu dezenvolvimentu durante tinan 20 nia laran.
Durante FRETILIN desidi sai ai-tonka ba governu atual ne’ebé nia nain loloos mak CNRT, Alkatiri hasai deklarasaun kro’at hasoru Xanana hanesan nia iha ambisaun hodi oho Xanana liu husi dalan politika mak hanesan atu halo dismistifikasaun ba Xanana, maibé ikus mai nia Alkatiri tenke hakerek karta ba Xanana hodi tuur hamutuk fali, maibé Xanana deklara ona sei tuur hamutuk ho se de’it kona-ba assuntu ne’e.
