DILI (TOP) – Reprezentante legal Fernando Gusmão no Diretor Kampaña José Manuel Fernandes Nakfilak ho Puto Naldo Rei hato’o ona kandidatu Prezidente Repúblika Francisco Guterres Lú Olo nia deskulpa ba públiku.
"Nu’udar kandidatu ba Prezidente Repúblika, ha’u husu deskulpa karik ha’u ka ha’u-nia apoiante ruma ofende ema ruma iha kampaña hala’o husi 2 marsu to’o 16 marsu 2022,’’ katak reprezenta kandidatu Lú Olo nian ne’ebé The Oe-Kusi Post (TOP) asesu husi pájina ofisial Lú Olo Kandidatu Prezidente Repúblika 2022-20227, Kinta 24 Marsu 2022.
Iha 19 marsu liubá, ita hotu ho idade 17 ba leten no rejista nu’udar eleitór iha STAE, vota atu hili Prezidente Repúblika ba períodu 2022-2027.
Maske nune'e, Sekretariu Jeral Partidu FRETILIN Mari Bim Amude Alkatiri kontinua halo akuzasaun oioin iha plata forma media sosial kona-ba rezultadu eleisaun ronde dahuluk nian.
Notisia relevante: Alkatiri hahu “fase-liman” ba Lú Olo nia derrota
Liuhusi tu’u iha boletin votu, ita ida-idak espresa direitu polítiku no demokrátiku ida. Tinan lima-lima eleitór hili, tuir nia hakarak rasik, ita-nia ema ida, atu sai Prezidente Repúblika. Direitu ne’e garante iha ita nia lei inan, Konstituisaun RDTL.
Eleisaun prezidensial regula ho lei espesiál ida - lei eleitoral ba Prezidente Repúblika. Ho baze iha lei ne’e mak mosu regulamentu oioin, inklui hatuur sentrus votasaun paralela atu hothotu ne’ebé servisu ka estuda ka tanba razaun seluk, bele vota iha munsípiu Dili, envesde fila ba munisípiu ida-idak nian, tuir kartaun eleitór.
Iha eleisaun liubá, kandidatu 16 mak taru malu atu manán konfiansa husi Povu eleitor no votus Povu nian fahe ba sira hotu. Haree ba totál votus válidus provizórius ne ‘ebé STAE fó ona, kandidatu nain rua mak manán votus barak liu maibé la liu 50%+1.
Tuir lei haruka, kandidatu nain rua ne’e mak sei kompete malu iha eleisaun demokrátika daruak hala’o iha 19 abril 2022.
Durante kanpaña eleitorál, Dr Francisco Guterres Lú Olo, hala’o mós nia knaar nu’ udar Prezidente Repúblika tuir regras hatuur iha ita-nia lei inan.
Hahú husi loron 17 marsu, Dr Francisco Guterres Lú Olo hala’o ninia knaar, ho tempu tomak, nu’udar Prezidente Repúblika.
Liuhusi ninia ekipa susesu, Prezidente Franscico Guterres Lú Olo hato’o mensájen tuir mai katak nu’udar kandidatu.
“Ha’u sente honradu tebes no agradese eleitor ida-idak ne’ebé fó fiar nafatin ba ha’u atu sai dala ida tan Prezidente Repúblika.
Konfiansa ne’e ha’u simu uluk liuhusi maluk rihun atus ida rua nulu resin lima ne’ebé asina petisaun no husu ba ha’u atu kandidata-an dala ida tan ba Prezidente Repúblika.
Konfiansa ne’e mai husi veteranus, jerasaun patriota, husi katuas-ferik to’o Juventude Loriku asuwain tomak, mai husi natar-nain no to’os nain sira, produtór kafé, traballador iha sektor públiku no privadu, estudante sira, intelektuál no akadémiku sira, husi munisípiu hothotu no RAEOA.
Ha’u agradese apoiu tomak no inkondisionál husi partidu FRETILIN ne’ebé mobiliza ninia rekursus umanus no lojístikus hodi apoia ha’u-nia kampaña tomak.
Ha’u agradese mós apoiu husi partidu “Os Verdes”, kuadrus partidu PLP no PUDD, organizasaun Kolimau 2000, organizasoins hothotu no sidadã no sidadaun ida-idak ba ha’u-nia kandidatura daruak.
Konfiansa no apoiu sira ne’e hotu mak habrane ha’u tebes iha kampaña hodi husu ba Povu vota ba ha’u sai Prezidente Repúblika ba Timor-Leste no ba Povu tomak.
Votasaun iha 19 marsu 2019 la’o ho hakmatek, livre, demokrátiku no ho órden. Ida ne’e hatudu katak ita-nia Povu hakarak tebes moris iha ambiente pás, trankilidade no estabilidade. Ambiente ida ne’e mak ha’u sempre promove no tanen iha ha’u-nia mandatu nu’udar Prezidente Repúblika.
Ha’u saúda kandidatu hothotu ne’ebé esforsa-an atu kampaña eleitoral la’o iha ambiente hakmatek to’o loron votasaun iha loron 19 marsu.
Husi ha’u nia parte, ha’u fó obrigadu barak ba esforsu tomak husi Tribunal Rekursu ba prosesu verifikasaun kandidatura, husi órgauns eleitorais, STAE no CNE, no mós husi ema hotu ne’ebé partisipa iha prosesu eleitorál hanesan fiskais no observadores internasionais. Agradese mós ba PNTL ne’ebé mantein ordem diak iha teritóriu tomak.
Ha’u fiar katak ita sei tama iha segunda kampaña ho ambiente hanesan kampaña daruak tanba ida ne’e mak vontade Povu Timor-Leste nian no ita ita-idak tenke haksolok.
Ha’u fiar katak ita hotu sei atua di’ak liután iha segunda kampaña no kandidatu ida-idak bele hato’o ninia kompromisu loloos ba Povu nu’udar Prezidente Repúblika. Liafuan ne’ebé sei hasae atu manán konfiansa Povu nian tenke halo ho maturidade polítika no seriedade, nu’udar ezemplu di’ak atu sidadaun hothotu no jerasaun foin-sae bele banati tuir iha eleisaun sira tuir mai. Timor-Leste presiza nafatin nia Prezidente Repúblika ida ba 2022 to’o 2027.
Nu’udar kandidatu ba Prezidente Repúblika, ha’u husu deskulpa karik ha’u ka ha’u-nia apoiante ruma ofende ema ruma iha kampaña hala’o husi 2 marsu to’o 16 marsu 2022’’.
Hato'o husi reprezentante Legal-Fernando Gusmao no Diretor Kampaña-Jose Manuel Fernandes Nakfilak, Puto Naldo Rei.
