DILI (TOP) – Kandidatu Prezidente Repúblika ho númeru sorteiu 06 atual Prezidente Repúblika no Prezidente Partidu FRETILIN Francisco Guterres Lú Olo hateten, nia prontu simu rezultadu eleisaun prezidensia bainhira hatudu nia lakon iha batalla ne’e, maibé nia Sekretariu Jeral Partidu FRETILIN Mari Bim Amude Alkatiri lakohi simu lakon hodi dehan Lú Olo manan tiha ona.
Lú Olo konsidera eleisaun ohin ne’e povu ezerse ona sira nia direitu demokrátiku hodi hadia, hala’o dezenvolvimentu ida ne’ebé sustentavél para hodi bele hadia povu sira nia moris.
Kona-ba prosesu sura votu, nia konfia ekipa sira ne’ebé hala’o sira nia serbisu iha kada sentru votasaun no estasaun votu sira iha teritóriu nasionál sei hala’o ho di’ak hodi bele halo apuramentu ho di’ak ba rezultadu eleisaun ne’ebé sei anunsia iha tempu tuir mai.
Lú Olo mós fiar aan katak, sei sai vensedor primeira ronde iha eleisaun ne’e, maibé nia preparadu no prontu simu lakon iha eleisaun ne’e bainhira rezultadu hatudu oin seluk.
“Militante ho simpatizante sira ne’e prontu sira ne’e sempre simu nafatin hela de’it rezultadu saida de’it. Agora ha’u hakarak apela ba iha hotu-hotu para iha vontade ida ne’e. Se mak kompete ne’e prontu para atu manan, no prontu para atu lakon, maibé ha’u dehan katak ha’u sei manan,” hateten Lú Olo ba jornalista sira hafoin vota iha sentru votasaun eskola bázika Farol-Dili, Sábadu 19 Marsu 2022.
Iha fatin hanesan, Sekretariu Jeral Partidu FRETILIN Mari Bim Amude Alkatiri hateten, laiha lia-fuan karik ba kandidatu PR Lú Olo atu manan.
Maske jornalista sira husu hela de’it pergunta prontu simu lakon ka la’e bainhira rezultadu eleisaun hatudu povu maioria vota ba kandidatura seluk, maibé resposta Alkatiri nian mak Lú Olo manan tiha ona eleisaun. Laiha lia-fuan karik Lú Olo sei manan eleisaun ne’e, maibé Alkatiri repete hela de’it katak, Lú Olo manan tiha ona eleisaun ne’e.
“Laiha karik, nia manan tiha ona. Ha’u dehan bebeik tiha ona, no ema balun seidauk hatene, maibé nia manan tiha ona,” hateten Alkatiri.
Iha parte seluk, kandidatu PR José Manuel Ramos-Horta hateten, nia preparadu no prontu ona atu simu rezultadu saida de’it. Karik rezultadu eleisaun ne’e hatudu nia lakon, Horta dehan nia prontu ona hodi simu rezultadu ne’e ho fuan no laran tomak.
“Rezultadu ne’ebé mak mai ha’u rasik hakruk maske la favorese karik ba ha’u, tanba ne’e desijaun povu nian,” katak Horta.
Eleisaun prezidensial ne’e hahu loke tiha ona ohin iha horas tuku 7 dadersan, no sei taka iha horas tuku lorokraik hodi kontinua ba prosesu sura nian.
Dadus husi Sekretariadu Tékniku ba Administrasaun Eleitorál (STAE) ne’ebé públika ona iha Jornál Repúblika katak, total eleitor bai ha eleisaun prezidensial 19 Marsu 2022 ne’e hamutuk 864.754 mai husi total populasaun hamutuk 1.491661 ne’ebé namkari iha munisipiu 14, postu administrativu 65, suku 452, no aldeia hamutuk 2233.
Husi total eleitor ne’e fahe ba sentru votasaun hamutuk 1200, no estasaun votu hamutuk 1500 iha teritóriu nasionál no rai-liur sira hanesan Australia, Portugal, Korea Sul, Inglatera, no Irlanda.
