DILI (TOP) — Dutrina “fase liman” no nega bebeik mak durante ne’e Sekretáriu Jeral Partidu Frente Revolusionáriu Timor Lorosa’e Independente (FRETILIN) Mari Bin Amude Alkatiri kuda no haburas iha rai-laran liliu ba militante FRETILIN sira.
Video badak ida ne’ebé oras ne’e sai viral iha plata forma media sosial sira tantu iha Facebook no WhatsApp hatudu militante FRETILIN sira lori sira nia motorizada ba halo provokasaun iha sede partidu CNRT nia oin molok ba tuir enseramentu kampaña kandidatu Prezidente Repúblika Francisco Guterres Lú Olo iha Tasi-Tolu-Dili iha loron Kuarta 16 Marsu 2022.
Video ne’e hatudu momoos militante FRETILIN sira uja atributu kandidatu PR Lú Olo nian mak ba halo provokasaun iha sede partidu CNRT nia oin hodi ikus mai militante CNRT sira mós responde hodi sita tiha motorizada rua.
Maske nune’e, sekretariu jeral partidu FRETILIN Mari Bim Amude Alkatiri durante nia diskursu iha enseramentu kandidatu PR Lú Olo iha Tasi-Tolu nega total provokasaun ne’e.
“Ohin balun ba provoka iha sira nia sede “CNRT” ne’e laloos ne’e sala,” Mari Bin Amude Alkatiri hateten iha ninia diskursu komisiu politika da-ikus ba kandidatu prezidente partidu FRETILIN Francisco Guterres Lú Olo ba periodu ba tinan 2022 to’o 2027, iha Tasi-tolu, suku Komoro, Postu Administrativu Dom-Aleixo, Munisipiu Dili, kuarta 16 Marsu 2022.
“FRETILIN la halo provokasaun, FRETILIN la halo komflitu FRETILIN la halo vingansa maibé FRETILIN buka justisa,” Alkatiri nega.
Eis Primeiru-Ministru governu minotiria 2017 ne’e katak, militante FRETILIN sira la halo provokasaun, la halo komflitu, la halo vingansa, la odiu maibé FRETILIN buka justisa, maibé lahatene buka justisa saida karik.
Entretantu, Adjuntu sekretariu jeral partidu FRETILIN José Manuel Fernandes “NAKFILAK” katak, nia foin simu informasaun militante balun mai kampaña iha Tasi-tolu halai tama iha ema nia sede hodi provoka situasaun iha sede CNRT bairu Grilhos, Dili.
“Ha’u simu informasaun katak, ohin ita atu mai kampaña ita nia militante balun ba tama iha ema nia sede laran hodi provoka situasaun iha ne’ebá. Tanba ne’e sira mós organiza malu hela iha sira nia sede hodi hein ita,” Nakfilak hateten.
Fatuberliu-oan ne’e hatutan, karik militante sira fiar labele responde ho provokasaun ida ne’ebé mak sira hakarak halo, la’o disiplina hatudu ba ema tomak.
“FRETILIN, iha Francisco Guterres Lu Olo nia ukun hakribi violensia nune’e tenke hatudu estabilidade ba paz,” nia informa.
