DILI (TOP) – Kandidatu Prezidente Repúblika husi partidu CNRT José Manuel Ramos Horta hateten, fó bem vindo ba sidadaun hotu inklui eis kandidatu sira ba nia kandidatura iha eleisaun prezidensial segundu ronde ne’ebé sei akontese iha Abirl 2022.
Parte CNE fó ona avizu ba kandidatu PR Horta ho Lú Olo hodi dada númeru sorteiu iha loron Kuarta 23 Marsu 2022.
“Ha’u kontente tebes ba rezultadu eleisaun ne’e. Demokrásia mak nune’e ona, demokrasia ne’e dinamiku, tanba ne’e ha’u husu mai ita ba vota dala ida tan, no bem vido ba se de’it atu mai hamutuk ho movimentu boot ne’e iha ha’u nia kandidatura,” hateten Horta liu husi konferensia ba imprensa iha sede kandidatura iha Aimutin, Dili, Tersa 22 Marsu 2022.
Ho rezultadu ne’ebé maske la to’o maioria absoluta, maibé Horta sente kontente no satisfaz tebes ho rezultadu ne’e.
“Ha’u sente kontente tanba ita hetan rezultadu di’ak, maibé atu hetan rezultadu sai di’ak liutan mai it aba vota tan iha segundu ronde,” katak Horta.
Nune’e mós Prezidente Partidu CNRT Kay Rala Xanana sente kontente tebes ho rezultadu ne’e, maibé nia konkorda total ho ideia Horta nian hodi fó bem vindo ba sidadaun hotu inklui eis kandidatu sira ba Horta kandidatu ne’e hodi bele hetan vitoria iha eleisaun daruak nian.
“Fó bem vindo ba sira, no ita hetan rezultadu di’ak iha primeira volta ne’e, maibé mai ita ba vota dala ida tan hodi hetan vitoria ida di’ak liun,” katak Xanana.
Eleisaun prezidensial iha ronde dahuluk akontese ona iha loron 19 Marsu 2022 ne’ebé kompostu husi kandidatu nain 16. Husi kandidatu hirak ne’e, povu maioria fó sira nia votu ba kandidatu PR ho númeru sorteiu 14 ho votu hamutuk 301,481 (46.58%), no tuir fali mak kandidatu Lú Olo ho votu hamutuk 143.408 (22,16%).
Hafoin eleisaun ne’e Sekretariadu Tékniku ba Administrasaun Eleitorál (STAE) presija loron tolu hodi sura ne’ebé hahu kedas iha loron 19 Marsu 2022 to’o remata iha loron 21 Marsu 2021.
Eleisaun prezidensial iha tinan ida ne’e, STAE rejista eleitor hamutuk 195.507 (22,74%), mak la partisipa iha votasaun.
Rezutladu husi kontajen votu hirak ne’e rezulta Kandidatu Prezidente Repúblika husi partidu CNRT ho númeru sorteiru 14, José Manuel Ramos-Horta hetan votu validu hamutuk 301,481 (46.58%), no kandidatu PR husi partidu FRETILIN Francisco Guterres Lú-Olo, hetan votu 143.408 (22,16%).
Kandidatu PR husi partidu KHUNTO Armanda Berta dos Santos hetan votu validu hamutuk 56,289 (8,70 %), kandidatu independente Lere Anan Timur hetan 48,959 (7,57%), kandidatu PR husi Partidu Demokrátiku (PD) Mariano Assanami Sabino hetan 47,008 (7,26%), kandidatu husi PDRT Anacleto Ferreira hetan 13,059 (%2,02), kandidatu independente Martinho Gusmão hetan 8.485 (1,31%), kandidatu Hermes da Rosa Correia Barros hetan 7,958 (1,23%), Milena Pires hetan 5,335 (0,82%), Isabel Ferreira hetan 4,165 (0,64%), Felisberto Araújo Duarte hetan 2,615 (0,40%), Constâncio Pinto hetan 2,474 (0,38%), Rogério Lobato hetan 2,028 (0,31%), Virgílio Guterres hetan 1,685 (0,26%), Antero Bendito hetan 1,531 (0,24%) no ikus liu mak Ângela Freitas hetan de’it 692 (0,11%).
Oras ne’e parte Komisaun Nasionál ba Eleisaun (CNE) mak halo apuramentu no verifikasaun ba votu nulu no reklamasaun sira, molok halo apuramentu finál no haruka ba Tribunál Rekursu (TR) hodi halo validasaun no anúnsiu rezultadu finál ba públiku.
Horta ho Xanana mós la haluhan hato’o agradesementu ba sidadaun hotu no partidu politika sira hotu ne’ebé fó ona sira nia votu ba iha kandidatu Horta nian, no lider nain-rua ne’e kontinua husu ba sidadaun sira hotu iha rai-laran atu labele sente kolen hodi ba vota dalan ida tan iha eleisaun segunda volta nian hodi bele hetan vitoria maioria absoluta.
