DILI (TOP) – Kandidatu Prezidente Repúblika José Manuel Ramos-Horta hateten, nia personalidade ne’e la toman atu ba dere ema seluk nia odamatan iha tuku 6 dadersan de’it.
“Ha’u mós la toman ida hodi dadersan tuku 6 de’it ba dere ona ema nia odamatan,” Horta hateten ho jestu oin hamnasa iha konferensia ba imprensa iha nia sede kandidatura iha Aimutin-Dili, Tersa 22 Marsu 2022.
Kandidatu Prezidente Repúblika husi partidu CNRT José Manuel Ramos-Horta ho oin hamnasa hateten, nia la toman ba dere ema seluk nia odataman iha horas tuku 6 dadersan. Horta dehan iha konferensia imprensa ohin iha nia sede kandidatu iha Aimutin-Dili, Tersa 22 Marsu 2022. Foto TOP.
Deklarasaun Horta nian ne’e ligadu ba Sekretariu Jeral partidu FRETILIN Mari Bim Amude Alkatiri ne’ebé iha loron Segunda 21 Marsu 2022 iha oras tuku 6 dadersan de’it ba buka ona kandidatu PR ho númeru sorteiu 8 Lere Anan Timur iha nia rezidensia, maibé lakonsege hasoru Lere, no bainhira Primeiru-Ministru Taur Matan Ruak mak ba vizita fali, Lere simu kedas hodi nain-rua konsege dadalia kuaje oras ida resin. No informasaun balun mós dehan Alkatiri ba dala rua tan iha Lere nia uma, maibé Lere nafatin la hasoru Alkatiri ho rajaun barak tebes, tanba antes ne’e Alkatiri rasik mak taka odamatan CCF nian ba Lere Anan Timur, no durante periodu kampaña eleisaun prezidensial nian mós Alkatiri sempre hasai lia-fuan kroat hasoru Lere Anan Timur hodi dehan Lere-tun, Lere-sa’e to’o Lere sala tiha.
Maske Alkatiri hasai lia-fuan insultu maka’as hasoru asuain FALINTIL atual membru CCF segundu jerasaun Lere Anan Timur, maibé iha loron Segunda 21 Marsu 2022 iha oras tuku 6 dadersa de’it Alkatiri hakat kedas ba Lere Anan Timur nia rezidensia iha Pantai Kelapa ho rajaun la klaru, maibé la konsege hasoru Lere iha tempu ne’eba.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
