DILI (TOP) — Vise Prezidente partidu CNRT Gil da Costa Monteiro “Oan Soru” husu ba kandidatu Prezidente Repúblika (PR) Francisco Guterres Lú Olo ho númeru sorteiu 6 atu labele fiar Meta Malik, Agusto Tara, ho José Nakfilak, tanba sira hotu sei vota ba fali kandidatu PR José Manuel Ramos-Horta ho númeru sorteriu 14 iha eleisaun prezidensial ne’e.
Oan Soru hatutan, ema nain tolu ne’e iha palku leten sira hakilar maka’as hodi hetan konfiansa husi Lú Olo ho Mari Alkatiri, maibé iha kotuk sira futu-lia hela hodi hamonu kandidatu Lú Olo nian iha eleisaun prezidensial ne’e.
“Ha’u konfia ha’u nia maun Meta Malik, ha’u konfia ha’u nia maun Tara no ha’u konfia ha’u nia kamarada Nakfilak tanba uluk sira halo politika iha oin agora maka sira joga hela maun “Lú Olo”, maun la hatene ida,” Oan Soru hateten iha enseramentu kampaña kandidatu PR José Manuel Ramos-Horta iha Tasi-Tolu, suku Komoro, Postu Administrativu Dom-Aleixo, Munisipiu Dili, Tersa 15 Marsu 2022.
Oan Soru husu ba kandidatu prezidente partidu FRETILIN Franscisco Guterres Lú Olo labele fiar demais kamarada Nakfilak, kamarada Meta Malik, no kamarada Tara tanba iha palku leten sira ko’alia maka’as, maibé iha kotuk sira futu-lia hela atu oinsa bele hamonu no halakon kandidatu Lú Olo iha eleisaun prezidensial ne’e.
“Tanba iha kotuk ami futu-lia (kong-kalikong) maun sei lakon. Ami ki’ik ne’e, koñese malu. Iha palku leten sira hakilar maibé iha kotuk dehan vota ba númeru 14,” nia hateten.
Iha parte seluk Sekretáriu Jeral Partidu Frente Revolusionáriu Timor Lorosa’e Independente (FRETILIN) Mari Bin Amude Alkatiri katak, prezidente partidu FRETILIN rekandidatu ba Prezidente Repúblika ba periodu tinan 2022 to’o 2027 ho povu nia votu la’os ho komputador nia votu.
“Apoiu kamarada Francisco Guterres Lú Olo manan ho povu nia votu la’os manan ho komputador nia votu,” Mari Bin Amude Alkatiri hateten iha enseramentu kampaña kandidatu prezidente partidu FRETILIN Francisco Guterres Lú Olo iha Tasi-Tolu, suku Komoro, Postu Administrativu Dom-Aleixo, Munisipiu Dili, Kuarta 16 Marsu 2022.
Sekretáriu Jerál Partidu FRETILIN ne’e konta, nia atu konta buat falsu ida katak urnas lori ba Maliana ka Munisipiu Bobonaro monu iha mota Núnura.
“Sira atu inventa katak voletin foun lori ba ne’e, vota (tú) tiha ona liu-liu númeru 6 ne’e. Tanba uluk sira halo hanesan ne’e, manu-mutin baku-fila sira nain rua hanoin katak, ha’u nia oin hanesan loos sira nia oin,” Alkatiri komenta ho lian maka’as iha palku leten.
