DILI (TOP) — Prezidente Komisaun Eleisaun (KNE) José Agustinho da Costa Belo hateten propaganda politika sira ne’ebé durante ne’e la’o maka’as loos iha plata forma media sosial sira ba kandidatura ba eleisaun prezidensial 2022, sei illegal hela, seidauk legal tanba seidauk hetan akreditasaun husi parte legal sira.
“Agora, nu’udar CNE ita seidauk ko’alia kona-ba ida ne’e. Tanba hafoin sira espresa hanoin maibé ita seidauk hanesan ne’e loloos. Maibé kuandu tama ona tenke la’o tuir regra sira katak bainhira maka kampañia iha fatin ne’ebé atu kampañia halo oinsa no modelu oinsa ami sei halo hela eletronikamente para labele soke malu,” hateten Prezidente Komisaun Nasionál ba Eleisaun José Agustinho da Costa Belo ba jornalista sira iha nia knar fatin edifisiu KNE iha Kolmera-Dili, Kinta 09 Dezembru 2021.
Nia dehan, lei ne’e sei presiza maluk sira nia partisipasaun iha festa demokrásia iha direitu ne’e maka termina sira nia kritika tanba Prezidente Repúblika seidauk promulga kalendariu tantu ba eleisaun prezidensial no eleisaun parlamentar.
“Agora ita nia Prezidente Repúblika seidauk promulga kalendariu,” nia informa.
Nia dehan, tuir lei ne’e, agora iha faze preparasaun seidauk ko’alia kona-ba faze eleisaun. Preparasaun ba eleitor sira prepara eleitor sira nia kondisaun. Tanba ne’e maka aban aprova mós regulamentu sira balun molok ba konsellu Ministru liu-liu prosedimentu kona-ba eleisaun regra sira ne’ebé maka iha kampañia ba festa demokrasia ne’ebé sei monu iha tinan oin.
“Tuir data ne’ebé maka iha Prezidente Repúblika eleisaun ne’e, sei aprova iha fulan Janeiru depois de tinan foun Prezidente Repúblika sei fo sai data ne’ebé maka ba eleisaun komesa ona, rejistu kandidatu sira depois ita haree ona 20 dias sé maka bele liu ita bele haree ona para ita bele prepara,” nia hateten.
Nia hatutan, eleisaun Prezidente Repúblika ne’e sei mosu iha fulan Marsu tinan oin ne’ebé data sei la’o hela. Agora kandidatu sira ne’ebé seidauk rekoñese dehan sira ne’e hanesan kandidatu laiha maibé intensaun atu promove sira nia aan ba publiku.
“Sira iha potensia hakarak atu kandidata aan ne’e kada individu ida kada ema ida hakarak espresa ninia hanoin maibé orgaun eleitorál hanesan mós tribunál ita seidauk hola kauza ida ne’e,” nia dehan.
Nia hatutan, sei kampañia tanba tuir lei depois de eleisaun situasaun la’o normal agora polisia mós tenke haree se kampaña boot perturba ordem públika PNTL tenke hola medidas.
