DILI (TOP) – Durante ne’e mosu tentativa balun husi poder informal balun inklui politika nain balun hodi labele realiza festa demokrasia iha tinan 2022 no 2023, maibé delegasaun Organizasaun Nasões Unidas (ONU) husi assuntu politika no harii paz diskuti ona planu eleisaun sira ho Prezidente partidu CNRT, Kay Rala Xanana Gusmão.
Iha nasaun demokrátiku, eleisaun jeral maka nu’udar dala loos, no dalan lejitimu hodi ka’er ukun iha nasaun ne’e nia laran. Demokrásia la hanorin, no nunka hanorin atu halai korta tun-sa’e hodi ka’er ukun no hetan poder. Atu hetan poder, no ka’er ukun, dalan iha ida de’it maka tenke hetan liu husi eleisaun jeral sira, la’os hetan fali liu husi halai korta tun-sa’e.
Povu Timor-Leste tomak sei hasoru eleisaun prezidensial iha tinan 2022, no eleisaun parlamentar sei akontese iha tinan 2023. Tanba ne’e, durante oras tolu nia laran, delegasaun ONU husi assuntu politiku no harii paz hasoru ona Prezidente CNRT, Kay Rala Xanana Gusmão hodi ko’alia kona-ba eleisaun rua ne’e.
Enkontru ne’e akontese iha iha sede CNRT Bairo Grilhos, Dili Sesta 15 Outubru 2021.
Maske enkontru ne’e taka ba públiku, maibé tuir informasaun balun ne’ebé The Oe-Kusi Post (TOP) asesu iha sede partidu CNRT katak, enkontru ne’ebe la’o kuaje oras tolu resin ne’e diskuti kona-ba apoiu tekniku ne’ebé sei apoia husi parte ONU nian ba eleisaun sira iha Timor-Leste.
Partisipa iha enkontru ne’e, ema nain-rua (feto ida-mane ida) husi parte delegasaun ONU nian, no parte husi CNRT kompostu husi Prezidente partidu CNRT nian, Kay Rala Xanana Gusmão ho nia vise-prezidente Tomás do Rosario Cabral.
