DILI (TOP) — Dadus estatístika husi governu kona-ba taxa populasaun ne’ebé kompleta ona simu vasina iha rai-laran foin maka to’o 41.2%, no foin simu vasina dahuluk to’o ona 65.0%.
Ho taxa populasaun ne’ebé maioria seidauk simu vasina kompletu, Primeiru-Ministru, Taur Matan Ruak desidi ona nia membru governu sira inklui nia rasik tun ona ba halo kampaña vasinasaun ne’e hodi hadau povo nia fuan-laran atu bele simu vasina ne’e.
Asosiasau HAK konsidera desijaun ba kampaña vasinasaun ne’e nu’udar politika dezastre boot ida ba governu atual, tanba kuaje membro governu tomak abandona hotu tiha sira nia serbisu principal sira, maibé sira hotu sai fali Ministru no Ministra Saúde.
“Ne’e polítika ida lakon dalan, laiha tan ona dalan dezenvolve rai ida ne’e hodi aproveita momentu (kampaña vasina) ne’e hodi gasta de’it osan. Ne’e polítika la planeadu, polítika dezastre, ministru hotu-hotu derepente sai fali ministra saúde nia fatin, ida ne’e polítika dezastre,” Diretor Asosiasaun HAK Sisto dos Santos hateten ba TOP foin lalais.
Nia dehan, tanba Primeiru-Ministru laiha ona dalan ida klaru atu dezenvolve rai ida ne’e maka hala’o fali programa ne’ebé mak tuir loloos Ministériu Saúde maka tenke halo.
“Ne’e laiha ajenda polítika kurtu prazu molok eleisaun, ne’e ami (HAK) deskonfia uza programa ne’e hodi halo fali konsolidasaun, ne’e ba halo kampaña vasinasaun ka ba konsolida militante partidu ba preparasaun eleisaun. Ko’alia loloos de’it labele subar iha kampaña vasinasaun halo fali misaun seluk ida,” nia deskonfia.
Desijaun ba halo kampaña vasinasaun ba populasaun sira iha teritoriu nasionál hasai husi reuniaun Konsellu Ministru sira ne’ebé lidera husi Primeiru-Ministru, Taur Matan Ruak. Kampaña vasinasaun ne’e hahu ona iha loron 30 Setembru liuba no sei termina iha loron 23 Outubru tinan ida ne’e.
Desijaun ne’e halo Asosiasaun HAK sente hakfodak tebes, tanba iha tempu hanesan ne’e ema (membru governu) hotu derepente sai dotor fali.
“Ha’u la hatene ita nia ministru sira iha kbi’it atu transmite loloos informasaun tuir standar Ministériu Saúde hato’o ka la’e. Sira (membru governu) ba duni asuntu kampaña vasinasaun ka keta iha asuntu seluk ruma.”
Sisto sujere, se membru governu hotu ba halo kampaña nasionál vasinasaun de’it, tanba saída maka la halo de’it programa simples ne’ebé ladun gastu orsamentu Estadu hodi nune’e osan bele atribui fali ba programa importante ne’ebé maka bele fó benefísiu ba povo.
“Vasina ne’e importante maibé, la’ós ministru sira maka tenki tuun, tanba saida maka la involve líder komunitáriu sira, dezde uluk HAK encoraja, tanba líder komunitáriu mak hatene loloos komunidade sira nia kbi’it no kondisaun. Maibé tanba de’it perdiem mak sira (membru governu) ba ka la iha ona servisu seluk mak sira ba hodi assume fali hotu servisu ministra saúde nia knaar ne’e HAK hakfodak.”
Kuandu hanesan ne’e maka bele halo komunidade sira hanoin katak iha nasaun doben ne’e ministériu seluk la iha ona só iha de’it ministériu saúde tanba hotu-hotu assume responsabilidade hanesan ministra saúde ou sai portavós ba ministra saúde.
“Ne’e governu desorganizadu ona, sira (governu) uza ida (kampaña vasinasaun) ne’e de’it atu hetan de’it perdiem, ba atu konsolida nia militante sira, ne’e ami (HAK) deskonfia, PDHJ no KAK tenki dehan buat ruma, ne’e ministru sira uza ida ne’e halo abuzu administrasaun para gasta de’it osan la tuir nia dalan (la fó benefísiu ba povu),” nia esplika.
