Se moras Covid-19 seidauk lakon iha TL, FRETILIN seidauk  bele halo kongresu

DILI (TOP) — Molok infetadu ba moras Covid-19, Sekretariu Jeral partidu FRETILIN, Mari Alkatiri deklara ona atu realiza kongresu nasionál iha fulan Setembru tinan ida ne’e, maibé ho derepente de’it deklara ba públiku katak, nia rasik ho nia membru familia balun positivu tebes kona Covid-19.

Ho infesaun ba Covid-19 ne’e, tuir komentariu balun katak, ne’e nu’udar estratejia Alkatiri nian hodi desvia tiha pakote Somotcho ho Rui Araújo ne’ebé deklara ona ba públiku atu kompete ba eleisaun iha kongresu nasionál ne’e. Kona-ba pakote ne’e to’o ohin loron seidauk pronunsia buat ruma, maibé bainhira nia ho nia familia sira infetadu ba Covid-19 nia halo kedas alert aba públiku liu husi nia konta media sosial Facebook iha tempu hirak liuba.

Nafatin ba iha assuntu kongresu FRETILIN ne’e, tuir Vise Sekretariu Jerál FRETILIN, deputadu Francisco Miranda Branco katak, bainhira moras Covid-19 seidauk lakon iha Timor-Leste, FRETILIN mós seidauk bele halo ninia kongresu nasionál.

“Maibé tanba situasaun surtu Covid-19 ne’e, ajenda sira ne’e labele realiza más ami hein katak, kuandu positivu moras Covid-19 ne’e menus, desizaun hosi Estadu bele loke ona dalan buat hotu-hotu bele realiza. Ami seidauk iha data definitivu ba kongresu nasional partidu FRETILIN ninian,” hateten Bianco ba jornalista sira iha bankada FRETILIN iha Parlamentu Nasionál, Dili, Kuarta 08 Setembru 2021.

Xefe bankada FRETILIN ne’e dun fali protokolu Covid-19 nian maka durante ne’e impede atividade partidu nian.

“Tuir loloos iha estrutura baze sira ne’e, ami halo restruturasaun hotu ona, mai to’o munisipiu sira depois hein iha nivel nasional, komisaun politika nasionál ne’ebé reuni bele desidi ba ajenda inkontru komite sentral Partidu FRETILIN ninian hodi  difini ajenda mós ba kongresu nasionál ninian,” nia informa.

Iha loron Tersa 24 Agostu 2021, Alkatiri deklara, nia rasik ho nia membru familia balun infetadu Covid-19.

"Maluk doben sira hotu. Ha'u la moe atu hatete ba publiku realidade ida ne'e, hotu-hotu hatene iha loron hira liuba ha'u dehan Covid-19 tama ona ha'u nia uma. Ha'u dehan, ha'u sei di'ak hela iha tempu ne'eba, agora ha'u atu dehan ba povu tomak katak ha'u rasik infetadu ona. Ha'u nia espoza, oan feto no bei-oan rua mos infetadu," Alkatiri deklara.

"Buiberes e Mauberes Asuwain. Hori uluk, hori ohin ita sempre brani hasoru dezafios oi-oin. Dezafios mai husi tasi, husi foho, husi laloran ka rai okos ita hasoru maibe sempre manan. Biar balu, barak tebes maka sakrifika sira nia an rasik, atu habadak ha'u nia lian ha'u hakarak halo apelo ba maluk doben sira hotu, Camaradas ka Adversários, liuliu ba ha'u  nia oan ka bei-oan doben sira iha Timor-Leste tomak atu kuidadu an ba. Favor hadok an husi COVID 19 agora ho variante Delta. Ha'u mos hatene, ho hau nia esperiênsia rasik, atu hado'ok nusa de'it ita nunka bele livre 100%, maibe sempre di'ak liu".

Tanba ne'e, nia parte nafatin fiar ema ida-idak sei la'o tuir orientasaun ne'ebe iha ho aten brandi no matenek hodi kombate inimigu invizivel.

"Ha'u fiar buat hotu-hotu sei la'o tuir siensia médika nia capasidade atu mitiga. Ita nia brandi mai husi ita ida-idak nia fiar no hametin ho siensia nia kapasidade," afirma nia.

Marcelino Bata
Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP. Bandu atu simu envelope ka sasan ruma husi fonte informasaun sira.

PUBLISIDADE

Online Counter