Ermera livre ona, Dili-Manufahi ho Ambeno mantein konfinamentu obrigatóriu

DILI (TOP) – Reuniaun Konsellu Ministru sira iha loron 01 Setembru 2021, desidi hodi liberta munisipiu Ermera, maibé kontinua sulan komunidade sira iha munisipiu Dili, Manufahi no Oe-Kusi Ambeno tuir pedidiu husi Sentru Integradu ba Jestaun Krize (SIJK).

Tuir komunikadu ba imprensa ne’ebé The Oe-Kusi Post (TOP) asesu iha portal governu, Konsellu Ministru hala’o sorumutuk iha Auditorium Ministériu Finansas nian, iha Dili no, hafoin halo análize ba aprezentasaun husi pontu situasaun epidemiolójika nasionál, husi koordenadór sira Sala Situasaun Sentru Integradu Jestaun Krize (SIJK) nian, desidi ona atu mantein konfinamentu obrigatóriu jerál (lockdown) ba populasaun iha munisípiu Dili, inklui ema ne’ebé maka vasina kontra Covid-19, to’o loron 9 fulan-setembru tinan 2021. Konsellu Ministrus sei avalia medida ida-ne'e iha sorumutuk tuir mai iha loron 8  fulan-setembru.

“Ema sira hotu iha Munisípiu Dili, inklui sira ne’ebé maka vasina kontra COVID-19, kontinua hela iha uma, bele sai de’it tanba razaun Saúde, ba serbisu (iha kazu administrasaun públika, superiór ierarkiku define funsionáriu ne’ebé maka dispensadu husi dever komparénsia), atu asesu ba sasan no serbisu ba nesesidade bázika no atu simu vasina kontra COVID-19”.

Taka ba públiku estabelesimentu komersiál, industriál, artezanál ka prestasaun servisu iha setór privadu ekonomia sira hotu ne’ebé dezenvolve atividade iha munisípiu Dili, ho esesaun sira ne’ebé maka prevee antes.

Kompara ho Rezolusaun anterior Rejista de’it alterasaun rua: permite atu sai husi uma ba fatin seluk hodi realiza resenseamentu eleitorál no ba parte seluk atu asegura funsionamentu ba empreza prestasaun servisu sira ba kontrolu peste nian (Pest Control)

“La renova impozisaun Konfinamentu Obrigatóriu Jerál (lockdown) ba populasaun iha Postu Administrativu Ermera no Railaku, iha Munisípiu Ermera”.

“Impoin serka sanitária iha Munisípiu Manufahi, hahú husi loron 2 fulan-setembru to’o loron 15 fulan-setembru tinan 2021”.

Bandu ema atu tama no sai husi munisípiu ne’e, exetu tanba siguransa públika, saúde públika, asisténsia umanitária, manutensaun sistema abastesimentu públiku ka realizasaun interese públiku.

Proibisaun hirak ne’e la inklui ema hirak ne’ebé maka komprova ona vasinasaun kompleta (doze rua) kontra COVID-19, nune’e mós ba labarik ki’ik sira ho idade  tinan neen mai-kraik ne’ebé akompaña ema sira ne’e.  

Serka sanitária sira-seluk ne’ebé sei vigora hela, la sofre alterasaun saida de’it.

Marcelino Bata
Author: Marcelino BataWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista TOP. Bandu atu simu envelope ka sasan ruma husi fonte informasaun sira.

PUBLISIDADE

Online Counter