DILI (TOP) — Ambeno-oan sira tantu estudante no sira ne’ebé mai buka moris iha kapital nasaun durante ne’e sente abandonadu tantu husi governu sentral no governu rejional Oe-Kusi Ambeno. Nune’e sira desidi ona hodi okupa edifisiu Rejiaun Administrativu Espesial Oe-Kusi Ambeno (RAEOA) iha Farol, Dili hodi hein to’o iha desijaun kona-ba movimentu transporte maritima nian.
Antes ne’e, Ambeno-oan sira ne’ebé hela iha Dili kuaje 200 resin hato’o petisaun ba Parlamentu Nasionál hodi ezije ba Prezidente Autoridade ba RAEOA, Arsenio Paixão Bano, no mós ba Ministériu Transporte no Komunikasaun hodi autoriza movimentu transporte maritima husi Dili ba Oe-Kusi Ambeno hodi bele transporta sidadaun sira ne’e, tanba durante ne’e sente abandonadu tebes husi governu.
Portavoz ba sidadaun hirak ne’e, Zecafriado A. Coa katak, durante ajizé ba Prezidente Autoridade Arsenio Paixão Bano hodi transporta sira ba RAEOA, infelizmente seidauk hetan solusaun to’o ohin loron.
Coa dehan, sira la konkorda tebes ho desijaun ne’ebé Bano desidi ona katak hafoin nia ekipa sira simu tiha vasina daruak nian maka foin mai Dili hodi tau matan ba ezijensia Ambeno-oan sira iha Dili.
“Hahu minutu ida ne’e. Ami sei toba iha resintu ne’e. Tanba ami konsidera gabinete RAEOA-ZESM Farol, Dili ne’e sai hanesan uma mahon ba Oe-Kusi oan hotu,” hateten portavoz Zecafriado A. Coa ba The Oe-Kusi Post (TOP), liuhusi konferénsia ba imprensa iha gabinete RAEOA-ZEESM, Farol, Dili, Tersa, 18 Maiu 2021.
Coa konsidera Bano ne’e laiha kapasidade atu buka solusaun ba situasaun difisil ne’e, maibé nia foti desijaun hodi permite de’it ema sira ne’ebé mai husi partidu politiku ne’ebé hanesan ho nia maka partidu FRETILIN.
“Tanba ne’e maka ami em nome kolega sira hamutuk ema nain 200 resin inklui pai-mae sira hateten katak diskulpa, Prezidente Autoridade RAEOA inkapasidade totalmente atu bele jere sofrimentu ne’ebé maka ami infrenta iha kapital Dili,” Coa afirma.
Nia dehan, durante ne’e Bano husu ba sira ne’ebé hela iha Dili tenke kalma lai itoan, maibé oinsa maka bele kalma bainhira ema lubuk hasoru hela problema hamlaha ne’ebé kauza husi Estadu emerjensia, serka sanitaria, konfinamentu obrigatoriu, no konfinamentu domisiliariu. Sasan sira ne’e hotu provoka ema barak maka lakon serbisu, no oras ne’e balun aluga uma mós osan laiha ona atu selu, no governu rejional RAEOA tur hakmatek de’it iha Oe-Kusi Ambeno.
Nia hatutan, Bano bandu sidadaun barak tenke kalma, maibé iha parte ida nia autoriza nia maluk sira la’o ba-mai livre hela.
“Prezidente Autoridade nafatin diskrimina ba haruka lista husi Oe-Kusi transporta de’it nia aliadu sira no nia ema sira ne’ebé maka nia hatene ba Oe-Kusi, ema ne’ebé maka Prezidente la hatene nia husik de’it iha kapital Dili hodi sofre hela situasaun ida ne’e”.
