AMBENO (TOP) – Prezidente Autoridade ba Rejiaun Administrativa Espesiál Oé-Kusi Ambeno (RAEOA), Arsenio Paixão Bano matenek aproveita nia mandatu molok atu remata iha tinan 2023, oras ne’e lalin malu ho nia kamarada sira hamutuk na’in-23 hodi ba tuir formasaun no “haksolok” iha Jakarta, Indonézia.
Tuir akordu kooperasaun entre kompañia Wartsila Indonézia, PT. PLN Bogor ho RAEOA katak, presiza de’it funsionariu eletrisidade RAEOA nain hitu (7) de’it mak atu ba tuir formasaun iha Jakarta, Indonézia, maibé faktu hatudu, kamarada Bano konsege lalin ema hamutuk na’in-23 mak ba Jakarta.
Molok hakat sai husi teritoriu Oe-Kusi Ambeno iha loron Tersa 25 Outubru 2022, Bano hateten ba jornalista sira katak, nia sente haksolok tebes tanba, formasaun ne’e importante duni ba funsionariu eletrisidade RAEOA hodi ba aumenta tan sira nia kbi’it, no matenek iha Jakarta, Indonézia.
Maibé, The Oe-Kusi Post (TOP) konsege deskobre no identifika, entre ema na’in-23 ne’e, so iha na’in-7 de’it mak nu’udar funsionariu eletrisidade RAEOA nian ne’ebé merese atu ba tuir duni formasaun iha Jakarta, maibé na’in-16 seluk ne’ebé uza povu nia osan ba atu “haksolok” de’it iha Jakarta.
“Ita haree ohin balu ba atu pasiar de’it, tanba ekipa dahuluk atu ba ne’e loloos ema na’in-hitu husi tékniku power-plant nian, entaun xefe departementu mak tenki lori ba, la’os balu laiha serbisu no la’os funsionáriu EDTL mós ba hotu, uza tan estadu nia osan, tan de’it atu haree ema nia rai,” hateten funsionariu eletrsidade ida ne’ebé husu ba TOP atu labele temi nia identidade pessoal no kargu iha notisia ne’e, tanba Arsenio Paixão Bano bele ezonera kedas nia bainhira le’e notisia ne’e.
“Ha’u bele dehan ne’e laiha lojika, tanba besik fim do ano ona sira gasta de’it osan hodi hamenus de’it ezekusaun OJE 2022 nian,” katak fonte funsionariu eletrisidade ne’e.
“Ida-ne’e mal gastu boot, sa tan ohin ita haree sira balu ba ne’e la’os funsionáriu iha EDTL nian, sira husi Bano nia gabinete mak barak liu, sira ba halo saida iha ne’ebá? Ba pasiar de’it.”
Hatan ba lamentasaun ne’e, Prezidente Autoridade RAEOA, Arsenio Paixão Bano klarifika, razaun funsionáriu sira ba atu tuir formasaun atu prepara sira ba futuru hodi responde ba fasilidade sentrál eletrik nian iha Inur Sakato, Oé-Kusi Ambeno.
“Ha’u ba Jakarta iha objetivu tolu, primeiru prinsipál atu lori ita-nia tékniku EDTL, husi sentrál elektrika Sakato atu halo formasaun bai ha Wartsila, tanba ita iha kontratu inklui formasaun ba ita-nia tékniku sira ema na’in-23, para sira bele hasa’e koñesimentu, no sei deskuti ho Wartsila kona-bá tinan 2023 kontratu remata, sei nafatin hetan asistensia ka la’e, tanba Oé-Kusi ahi lakan oras 24 kobre hotu suku 18 iha territóriu Oé-Kusi Ambeno, tanba ha’u lakohi problema akontese iha komunidade, tanba ne’e mak formasaun ne’e importante tebes,” Bano klarifika.
Xefe Departamentu EDTL Oé-Kusi Ambeno, Armindo Mendonça mós haforsa tan, atividade treinamentu ne’e fasilita husi empreza Wartsila no PT, PLN Bogor iha Jakarta Indonésia.
“Ita ba tanba planu no orsamentu ba treinamentu funsionáriu EDTL iha ona, agora ita ba grupu rua, grupu ida mai husi power-plant, no grupu ida mai husi liña distribuisaun. No treinamentu ne’e fahe ba ekipa haat, power-plant iha ekipa rua, no liña distrinbuisaun mós iha ekipa rua” nia esplika.
Kompañia Wartsila Indonézia mak manan tenderizasaun hodi harii projetu power-plant iha Inur Sakato, Oe-Kusi Ambeno iha governasaun Primeiru-Ministru, Kay Rala Xanana Gusmão iha loron 27 Novembru 2014 ho osan hamutuk $10,588,625.00. Faktu istoriku ne’e hatudu, projetu power-plant iha Inur Sakato ne’e la’os obra husi Prezidente Autoridade RAEOA dahuluk, Mari Bim Amude Alkatiri nian, maibé nu’udar obra husi Komandante em Xefe das FALINTIL, Kay Rala Xanana Gusmão nian.
Bainhira Kay Rala Xanana Gusmão nomeia Alkatiri hodi sai nu’udar jestor ba projetu pilotu Zona Espesial ba Ekonomia no Sosial Merkadu (ZEESM), prosesu konstrusaun ba projetu power-plant iha Inur Sakato ne’e remata ona, no Alkatiri mak inagura de’it iha tempu ne’eba.
No durante ne’e mós Bano kontinua fó konfiansa ba kompañia Wartsila ne’e hodi halo operasaun no manutensaun ba power-plant Inur Sakato ne’ebé hetan ona pagamentu husi RAEOA ho osan hamutuk $151,949.15 iha loron 11 Jullu 2021.
