DILI (TOP) – Rezultadu reuniaun Konsellu Ministru sira fó sai sidadaun sira ne’ebé kompleta ona simu vasina Covid-19 daruak nian bele la’o livre ona iha teritóriu nasionál, no la presija hein tan loron 14, maibé Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano hamosu desijaun kontra hodi dehan, se de’it maka ba Oe-Kusi Ambeno voluntariamente hasai teste swab ho rajaun atu evita propagasaun komunitaria.
“Hafoin simu doze rua vasina hasoru covid-19 bele la’o ba mai livre iha territóriu nasionál no la presiza karta autorizasaun. Presiza de’it aprezenta komprovativu vasinasaun nian iha pontu entrada serka sanitária nian no bainhira autoridade sira husu,” Ministru Prezidénsia Konsellu Ministrus, Fidelis Manuel Leite Magalhães esplika iha nia pájina ofisial.
Governante husi munisipiu Bobonaro ne’e esplika, hahu husi momentu ne’ebé simu vasina doze daruak no la presiza mós hein to’o loron 14. Labarik sira ho idade tinan 6 mai kraik bele mós sirkula livre sein limitasaun saida de’it.
“Decisão Conselho de Ministros klaru. Se mak vacina completo, katak vacina ona dala rua, bele lao livre kedan. Precisa hatudu deit mak comprovativo ka certificado vacina. Governu decide la implementa recomendação OMS nebe dehan vacina completo significa “vacina dose rua mais 14 dias”. Governu Timor Leste decide katak vacina completo significa vacina dose rua completo sem tenke hein tan 14 dias,” esplika governante husi Partidu Libertasaun Popular (PLP) ne’e.
Nia emfaze, la presija hein tan to’o loron 14 hafoin vacina ba dalarua antes halo viagem iha território nacional. Husu instituisaum hotu ne’ebé implementa desijaun sira Konsellu Ministru nian atu halo tuir ida ne’e, maibé Prezidente Autoridade ba Rejiaun Administrativu Espesial Oe-Kusi Ambeno (RAEOA), Arsenio Paixão Bano hamosu desijaun kontra hodi dehan, se de’it maka ba Oe-Kusi Ambeno voluntariamente hasai teste swab ho rajaun atu evita propagasaun komunitaria.
“Tuir dekretu ne’ebé governo aprova ona, livre sirkulasaun halo ba sira ne’ebé hetan ona vasina dala rua, entaun sira ne’ebé maka iha ona vasina dala rua AstraZeneca ka seluk tan, bele mai RAEOA la tama (la submete) ona kuarentena obrigatoriu ka auto-quarentena, maibé RAEOA husu voluntariamente halo swabnose test antes mai Oé-Cusse ka halo swabnose test bainhira to’o Oé-Cusse hodi tulun RAEOA kontrola transmisaun lokal no komunitaria,” esplika Bano liu husi pájina ofisial ZEESM TL.
Nia hatutan, sira ne’ebé seidauk hetan ka foin hetan dala ida vasina AstraZeneca ka seluk tan sei submete karantina no auto-kuarentena durante loron 14 nia laran iha RAEOA bainhira tama husi Dili ka fronteira Oé-Cusse.
