Merenda eskolar Ambeno la’o hanesan mehi

AMBENO (TOP) ─ Diretór Eskola Bazika Central Públiku Palaban (EBC), Vincencio Cono konsidera implementasaun programa merenda eskolar ba eskola sira iha Rejiaun Administrativa Espesial Oe-Kusi Ambeno (RAEOA), la’o hanesan mehi tanba, programa ne’e la la’o kleur ona.

“Programa merenda eskolar ne’e programa Estadu nian li-liu parte governo orgaun ba Ministériu Edukasaun katak kada loron efetivu estudante ida tenki han osan $0,25 Centavos, tanba ne’e direitu estudante ninian, lala’ok merenda eskolar ida ne’e dala ruma mós la’o ho impedimentu barak, liliu fasilidade kuziña nia ekimpamentu sira la to’o, no mós dala ruma implementasaun iha periodu tomak kada tinan maibé, tinan ida iha periodu primeiru laiha, lahatene tanba saida maka laiha, agora tama ona ba segundu periodu foin maka iha,” hateten Vincencio Cono ba The Oe-Kusi Post iha Oe-Kusi Ambeno, 01 Juñu 2021.

Nia konta, programa seluk atu tulun merenda eskolar iha problema itoan ba konsesaun atu hadia  buat ruma iha eskola, konsesaun ne’e kada estudante fulan ida estudante ida tenki simu $1 maibé, dalaruma  iha periodu ida estudante ida simu de’it fulan ida.

Diretór Eskola Bazika Central Públiku Palaban (EBC), Vincencio Cono. Foto TOP/João Caunan.

“Hanesan mós oras ne’e dadaun merenda eskolar simu de’it 14 dias husi Sekretáriu Edukasaun Solidaridade Sosial dehan tenki simu 28 dias maibé, durante simu 14 dias, ami seidauk hatene ninia progresu ba ne’e simu tan 14 dias ka la’e no programa merenda ida ne’e sei iha kontinuasaun ka la’e, tanba foin lalais primeiru periodu laiha”.

Nia hatutan, total estudante iha eskola báziku públiku Palaban hamutuk 979 no mós profesor hamutuk nain 24 inklui guarda nain rua.

Hatan kona-ba ba kestaun ne’e Sekretária Rejional Edukasaun Solidaridade Sosial RAEOA, Avelina da Costa katak, kona-ba programa merenda eskolar “ami hala’o iha primeiru periodu fulan Marsu tinan 2021 tanba, iha tinan hirak liuba laiha tanba, impede husi pandemia Covid-19,” esplika Avelina.

Sekretária Rejional Edukasaun Solidaridade Sosial RAEOA, Avelina da Costa. Foto TOP/João Caunan.

”Programa merenda eskolar ami foin hahu iha fulan Marsu tinan 2021 no estudante sira ne’ebé maka simu ona merenda hamutuk $18.145,000, no orsamentu hamutuk $131.816,000.000 kona-ba progresu ba estudante sira hahan ne’e la’os 14 dias maibe, 28 dias efetivu, agora foos ne’ebé  maka ami distribui ba estudante hamutuk 1150,” Avelina afirma.

“Iha primeiru periodu laiha merenda tanba, ami iha planu atu halo programa pilotu ba eskola ha’at ne’ebé maka ami hanoin katak, atu fornese husi kompañia, labarik sira simu voucher de’it, entau kompañia maka fahe ai-han”.

João Caunan
Author: João CaunanWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Jornalista
Jornalista The Oekusi Post iha Ambeno, Oekusi, RAEOA. Bandu atu hetan envelope ka sasan ruma husi fontes informasaun sira.

PUBLISIDADE