Xanana mak primeiru lugar sosializa medida prevensaun Covid-19

GROTU (TOP) – Hafoin surtu moras virus corona (Covid-19) mosu iha Timor-Leste, governu hahu halo ona medida prevensaun Covid-19 iha teritóriu nasionál, maibé Premiadu Nobel ba Paz, José Manuel Ramos Horta fó ona apresiasaun boot ba eis Primeiru-Ministru, Kay Rala Xanana Gusmao okupa primeiru lugar ba kampana prevensaun Covid-19 iha Timor-Leste.  

Horta hatutan, durante ne’e nia mós halo asaun karidade no sosializa medida prevensaun Covid-19 iha rai-laran, maibé la to’o, no la boot liu asaun no sosializasaun ne’ebé halo husi Kay Rala Xanana Gusmao nian.

Horta esplika asaun sira ne’ebé durante nia halo hetan tulun husi embaixador Indonézia iha Timor-Leste, no Korea Sul. Embaixador China mós ajuda, no Embaixador Australia uja nia osan rasik ba sosa bola entrega ba Horta. Inklui empreza China Harbour sira halo portu Tibar ne’e mós ajuda inklui Isabel Ferreira.

“Ema barak mak halo. Buat ne’e la’os politika. Avo Nana mak ijemplu primeiru lugar,” hateten Horta bainhira akompana Kay Rala Xanana Gusmao ba halo asaun karidade no sosializa medida prevensaun Covid-19 ba komunidade sira iha suku Grotu, postu Same, munisipiu Manufahi, Tersa 22 Setembru 2020.

Hortan dehan, durante nia vizita sira iha fatin balun iha teritóriu nasionál, nia rona informasaun no halerik balun husi komunidade sira katak, sira presija loos prezensa Kay Rala Xanana Gusmao nian iha sira nia fatin. Sira la presija atu lori foos no hahan seluk tan, maibé presija liu nia prejensa fizikamente iha sira nia le’et.

“Ha’u rona komunidade sira dehan lia-fuan ida hanesan poezia. Sira dehan nune’e, ami hamrok, maibé hamrok ba Avo Nana nia lian, la’os hamrok ba bee. Ami hamlaha, hamlaha ba Avo Nana nia prezensa, la’os hamlaha ba hahan,” Horta informa assuntu ne’e bainhira akompana Kay Rala Xanana Gusmao halo asaun karidade no sosializa medida prevensaun Covid-19 ba komunidade sira iha suku Grotu, postu, munisipiu Manufahi, Tersa 22 Setembru 2020.

Horta esplika asaun karitativa ne’e la’os politika, maibé nakloke ba se de’it mak iha sentimentu, iha kapasidade bele halo.

“Avo Nana mak ijemplu número um, tanba ho nia ijemplu autoridade moral, karisma konsege muda, konsege mobiliza, maibé ha’u hatete mós buat ida kuandu to’o tempu krize, krize politika, krize seguransa ka krize ida agora dadauk ate povu to’o konfunde ne’e, lider sira tenke marka prezensa iha povu nia le’et. La’os lider sira tauk Covid-19, entaun sulan iha uma la sai. Se lider sira tauk tanba Covid-19, entaun povu tauk liutan, tanba lahatene oinsa atu proteze aan,” Horta esplika.  

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter