Durante tinan 2 povu Fahi-Nehan aguenta ho Maek de’it

FAHI-NEHAN (TOP) – Maek sai nu’udar ai-han prinsipal ba komunidade sira iha suku Fahi-Nehan molok baze de apoiu rahun, no situasaun ne’e mós kontinua akontese ba komunidade sira ne’e iha era ukun aan, tanba ho konidsaun folin kafé ne’ebé tun iha área merkadoria maek mak troka fali.

Xefe suku Fahi-Nehan, postu Fatuberliu, munisipiu Manufahi, António da Conceição katak, Fahi-Nehan iha problema lubuk ida hanesan kondisaun estrada la di’ak, bee moos laiha, no seidauk asesu ba enerjia eletrisidade.

“Durante tinan rua ha’u nia povu moris ho maek de’it,” hateten xefe suku Fahi-Nehan, António da Conceição ba jornalista sira iha suku Fahi-Nehan, Kinta 24 Setembru 2020.

Nia esplika, durante tinan hirak ikus ne’e, kafé nia folin iha merkadu tun maka’as hodi halo komunidade sira tenke buka alternativa atu bele aguenta sustenta nesesidade uma laran nian.

“Maek ne’e mak lalais liu kompara ho kafé hein fali to’o fulan 6 ka liu hanesan ne’e mak foin fa’an fali, maibé agora maek ne’e ema mai sosa depois mak sira uja osan ne’e hodi sosa fali buat seluk,” nia esplika.

Nia dehan, kondisaun estrada mós durante tinan barak seidauk hadia to’o ohin loron.

“Ami só hare kareta-motor iha tempu bailoron de’it. Kuandu tama ona ba tempu udan kareta-motor labele mai, tanba estrada mak la di’ak,” nia esplika.

Nia dehan, Fahi-Nehan riku ho produtu lokál rai-laran nian hanesan kafé, maek, koto, no seluk tan.

“Maibé susar atu transporta ba merkadu, tanba alem de distansia do’ok husi kapital Same, no kondisaun estrada mak la di’ak. A’at liutan iha tempu udan hakur tan mota rua ne’e, entaun komunidade sira labele bo’ok aan,” nia esplika.

Entretantu, Prezidente Autoridade Munisipiu Manufahi, Arante Isac Sarmento hateten, munisipiu Manufahi iha suku 14 maka to’o oras ne’e seidauk asesu ba eletrisidade. 

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter