Oekusipost.com Dili – Prosesu amostra espesimé ne’ebé hala’o husi ekipa vijilánsia epidemiolójika ba ema nain 79 husi munisipiu Likisa, oras ne’e rezultadu hatudu nain 27 mak negativu ona, no nain 52 sei hein rezultadu laboratóriu.
Portavóz Sentru Integradu ba Jestaun Krize, dotór Rui Maria de Araújo hateten, iha Munisipiu Likisa, esforsu atu halo triajen ba kazu suspeitu Covid 19, ho esforsu atu halo vijilánsia sentinela hodi determina se iha ona transmissaun iha komunidade ka la’e, nafatin la’o hela.
“To’o ohin meiu-dia, ekipa vijilánsia epidemiolójika Munisipiu Liquiça rekolle ona 79 amostras espesimé, 27 negativu, 52 sei hein rezultadu laboratóriu,” hateten dotór Rui liu husi konferensia ba imprensa iha Sala Situasaun Sentru Integradu ba Jestaun Krize iha Sentru Konvensaun Dili, Kuarta 29 Abril 2020.
Nia hatutan, Ministériu Saúde prepara hela planu asaun atu espande métodu vijilánsia sentinela, ba munisipiu no Sentru Saúde sira hotu iha Timor-Leste nia laran tomak.
