TABAKOLOT (TOP) – Povu Kovalima simu saudozu Alvaro do Nascimento "Sesurai" nia mate-isin ho dadolin bainhira lori fila husi nia uma lisan Puh Gewen iha Postu Zumalai ba nia rezidensia iha aldeia Tabakolot, suku Debos, Postu Suai villa.
Iha dadolin ne'e veteranu sira iha Kovalima inklui familia matebian barak maka triste ho mataben turuk, tanba lakon aman luta nain ida ba libertasaun nasionál.
"Ho ita boot maka ita forsa, ita maka na’in ba susesu, no ita maka manu aman, independensia, liberdade no ukun rasik aan iha ita boot nia liman, maibé ohin loron nakukun falun ami,” Miguel Armada hato’o lia dadolin molok lori saudozo nia mate-isin tama ba nia rezidensia.
Saudozu Sesurai.
Saudozo Alvaro do Nascimento "Sesurai" moris iha Aldeia Pelet Suku Lour Postu Zumalai iha loron 05 fulan Juñu tinan 1965. Sesurai mai husi uma lisan Puh Gewen, husi aman naran MAU LACA no inan naran BUI LETO. Saudozu hanesan oan ba dala ikus husi maun-nain ida no bin-nain rua.
Iha tinan 1972 to’o 1973, saudozu kontinua inia estudu segundu no terseiru klase iha Eskola Militar Anapal to’o tinan tinan 1974, maibé la konsege remata nia estudu ne’e, tanba mosu ona diverjénsia politika partidaria no golpe iha rai-laran.
Saudozu nia partisipasaun luta ba libertasaun nasionál
Iha tinan 1975 to’o tinan 1979, saudozu hahu nia involvimentu funu iha baze de apoiu no durante periodu iha ai-laran saudozu asume kargu nu'udar Primeiru Vise Responsável ba Edukasaun no Kultura.
Povu Kovalima simu saudozu Alvaro do Nascimento "Sesurai" nia mate-isin ho dadolin bainhira lori fila husi nia uma lisan Puh Gewen iha Postu Zumalai ba nia rezidensia iha aldeia Tabakolot, suku Debos, Postu Suai villa. Foto TOP/Tynho Gusmão.
Mai fali iha tinan 1981 to’o 1983, saudozu kontniua hala'o serbisu iha frente kladestina CRRN nudar ativista iha Zumalai, no husi tinan 1984 to'o 1986 saudozu asume kargo nu'udar kolaborador OCR iha Dili. Husi tinan 1987 to’o 1989 saudozu asume kargu nu'udar Vise-Sekretariu OCR iha Dili.
Iha tinan 1989 to’o 1992 saudozu asume kargu nu’udar sekretariu ODIR, no husi tinan 1992 to’o 1999 saudozu asume kargo nu'udar Sekretariu Sub Rejião 12 de Outubro to'o funu remata.
Prezidente Konsellu Veteranu Munisipiu Kovalima Alvaro do Nascimento "Sesurai" hakotu iis iha Hospital Nasional Guido Valadares (HNGV) Dili iha loron Tersa 16 Novembru 2021 oras tuku 9 dadersan, tanba sofre moras komplikadu kleur ona.
Iha Loron Kuarta 17 Novembru 2021, mate isin lori husi Dili ba Munisipiu Kovalima, Postu Zumalai hodi deskansa iha nia uma lisan Puh Gewen, no Kinta 18 Novembru 2021 kontinua evakua saudozu husi Postu Zumalai ba iha saudozu nia rezidensia iha aldeia Tabakolot Suku Debos.
Tuir ajenda, serimónia funebre ba saudozu Alvaro do Nascimento "Sesurai" sei realiza iha loron Sesta 19 Novembru 2021 iha nia rezidensia iha aldeia Tabakolot, suku Debos, Postu Suai.
Author:Raimundos OkiWebsite:https://www.oekusipost.comEmail:Este endereço de email está sendo protegido de spambots. Você precisa do JavaScript ativado para vê-lo.
