SUAI (TOP) – Povu sira iha munisipiu Kovalima ba tinan ida ne’e sei komemora loron proklamasaun independensia Timor-Leste ho apoiu osan hamutuk $12,800.00.
Xefe Komisaun ba komememorasaun ne’e, Francisco de Jesus Alves esplika, administrasaun munisipiu Kovalima prevé orsamentu hamutuk $12,800.00 hodi halo preparasaun ba komemorasaun loron proklamasaun independensia ba dala 48 iha munisipiu Kovalima.
Nia hatutan, husi total osan ne’e sei aloka ba kada Postu Administrativu sira ne'ebé eziste iha Kovalima hodi nune'e bele realiza serimónia komemorasaun loron historiku iha kada postu administrativu.
"Total orsamentu ne'ebé maka ita prevé hamutuk $12,800.00, maibé husi total ne'e, hamutuk $4500.00 sei aloka ba postu 6 hanesan Maukatar, Fatululik, Fatumea, Fohorem, Tilomar, Zumalai, ne'ebé kada postu sei hetan $750.00 atu nune'e sira bele realiza serimónia komemorasaun loron proklamasaun independénsia iha sira nia suku rasik," katak xefe komisaun Francisco de Jesus Alves ba The Oe-Kusi Post (TOP) iha edifisiu Administrasaun Munisipiu Kovalima, Tersa, 16 Novembru 2021.
Nia husu ba komunidade sira iha postu Suai villa atu partisipa maximu iha serimónia komemorasaun loron historiku ne'e, tanba atividade barak maka sei realiza iha Postu Suai kompostu husi desportu komunitaria no animasaun kultural inklui atividade seluk tan.
"Ita sei iha aktividade desportu komunitaria hanesandada tali, halai kuda, depois dansa kultural, kompetisaun kanta ba estudante sira, poezia, ne'ebé buat barak loos, tanba ne'e ami sei prepara prémiu balun atu nune'e bele fó ba manan nain sira ne'ebé iha Postu Suai ne'e suku lima maka tuir kompetisaun hanesan suku Debos, Beko, Kamnasa, Suai Loro, Labarai, tanba ne’e maka ha’u kusu ba komunidade hotu tenke partisipa iha serimónia importante ne'e," nia informa.
Nia dehan, komemorasaun loron historiku ne’e sei realiza iha kampu Futebool Ladi, Suai, Kovalima.
