Povu Kovalima triste ho sesurai nia mate

SUAI (TOP) Povu Kovalima, liliu familia veteran sira iha munisipiu Kovalima inklui munisipiu sira seluk oras ne’e sente triste tebes, tanba lakon tan ona funu nain-ida.

Prezidente Konsellu Veteranu munisipiu Kovalima Alvaro do Nascimento "Sesurai" hakotu is iha Hospital Nasional Guido Valadares (HNGV) Dili iha loron Tersa 16 Novembru 2021 oras tuku 9 dadersan, tanba sofre moras komplikadu kleur ona.

Sekretariu Konsellu Veteranu munisipiu Kovalima, Ozorio Soares "Mau Soko" inklui familia husi matebian to’o oras ne’e seidauk prontu hodi hato’o deklarasaun ruma kona-ba saudozu Sesurai nia mate.

Maibé, reprezenta povu Kovalima Administrador Munisipiu Kovalima, Francisco de Andrade sente triste tebes tanba lakon tan ona aman veteranu di’ak ida iha Kovalima, ho nune'e nia parte hein evakuasaun mate-isin mai iha Kovalima.

"Ita nia aman "Sesurai" ema ne'ebé maka aman ba  veteranu sira iha Kovalima ne'ebé maka lidera funu iha tempu naruk, tanba ne'e ha’u hanesan administrador munisipiu hamutuk ho povu sira hein nia mate-isin lori mai iha Kovalima hodi fó presta homenazen tanba ne'e maka agora ami prepara hela," katak administrador Francisco de Andrade ba jornalista sira iha Suai, Kovalima, Tersa 16 Novembru 2021.

Saudozu Sesurai assume kna’ar nu’udar vise-sekretáriu rejiaun IV durante luta ba libertasaun nasionál. Saudozu moris iha loron 06 Maiu 1965 iha Kovalima, no hakotu iis iha HNGV iha loron Tersa 16 Novembru 2021 iha horas tuku 9 dadersan.

Veteranu barak maka konsentra ona iha edifisiu Konsellu Veteranu Munisipiu Kovalima hodi simu mate-isin saudozu Sesurai iha loron Kuarta 17 Novembru 2021. Foto TOP/Tynho Gusmão.

Observasaun Jornalísta The Oe-Kusi Post (TOP) iha terenu, veteranu barak maka konsentra ona iha edifisiu Konsellu Veteranu Munisipiu Kovalima, no mós iha saudozu Sesurai nia rezidensia hodi halo preparasaun simu mate-isin ne'ebé sei transporta ba Kovalima iha loron Kuarta 17 Novembru 2021.

Raimundos Oki
Author: Raimundos OkiWebsite: https://www.oekusipost.comEmail: Este endereço de email está sendo protegido de spambots. Você precisa do JavaScript ativado para vê-lo.
Xefe Redasaun & Editor

PUBLISIDADE

Online Counter