SUAI (TOP) – Ministériu Administrasaun Estatal (MAE) aloka orsamentu $97,860.00 ba Munisipiu Kovalima hodi uja ba prosesu rehabilitasaun sede suku ualu (8) ba faze daruak nian iha munisipiu Kovalima.
Husi total Sede Suku ualu (8) iha Kovalima ne'ebé atu rehabilita ba faze daruak nian kompostu husi Postu Suai vila hamutuk lima (5) no Postu Fatumea hamutuk tolu (3), maibé prosessu implementasaun sei iha etapa mobilizasaun trabalador, no sei iha hela prosessu aprovisionamentu.
"Rehabilitasaun sede suku ba faze daruak ne'e hamutuk ualu, ne'ebé agora dadaun governu liuhusi MAE aloka ona orsamentu por volta noventa sete mil, oito centos sesenta ($.97,860.00) para utiliza finansia atividade reabilitasaun sede suku ualu (8), maibé implementasaun sei iha etapa mobilizasaun trabalador no prosessu aprovisionamentu depois hotu maka tama iha projetu físiku," katak diretór Programa Nasionál ba Dezenvolvimentu Suku, Filipe Cardoso ba The Oe-Kusi Post iha Suai, Kovalima, Segunda, 15 Novembru 2021.
Filipe hatutan, prosesu rehabilitasaun ba sede suku sanulu (10) ba faze dahuluk nian iha munisipiu Kovalima antes ne’e governu aloka ona orsamentu hamutuk $139,241.93, maibé iha sede suku sia (9) maka atinji ona 100%, no falta sede suku ida maka seidauk tanba enfrenta difikuldade kondisaun estrada ne'ebé a’at.
"So iha suku Ucekai foin atinji 56%, tanba kondisaun estrada a’at entaun, afeta ba movimentasaun fornesedor sira atu lori materiál konstrusaun ba iha ne'eba" Filipe Cardoso informa.
Maske enfrenta difikuldade, tuir nia katak, ekipa PNDS hamutuk ho ekipa jestaun suku kontinua halo rehabilitasaun hodi nune'e fulan oin bele atinji 100%.
Entretantu, prosessu implementasaun Uma Kbi'it Laek (UKL) ne’ebé finansia husi governu Australia hamutuk 90 iha Kovalima foin maka to’o 48%, maibé diretór ne'e rekoñese tuir "Global Time Line"aktividade ne'e atraju tanba enfrenta situasaun surtu Covid-19 iha Timor-Leste.
"Bazeia ba Global Time Line aktividade ne'e atraju tanba kestaun maka ohin ha’u dehan ne'e, implementa serka sanitária tanba ne'e maka atraju ne'e," nia justifika.
Jeralmente, atividade PNDS ne'ebé implementa iha munisipiu Kovalima ne'ebé PNDS regula rasik maka UKL, reabilitasaun sede suku faze I no II, hamutuk iha projetu 143.
Iha inisiu tinan 2021 governu liuhusi Ministériu Administrasaun Estatál, Miguel Pereira de Carvalho katak, governu sei hari uma hamutuk 1272 iha rai-laran.
