KOVALIMA (TOP) – INFORDEPE hamutuk ho Parseiru Apoiu Lideransa liu husi Mentoria no Aprendijazem (ALMA) fó formasaun ba datoluk kona-ba jestaun lideransa nian ba diretur, adjuntu, no kordenador Eskola Báziku Filial no Central (EBF-EBC) sira iha munisipiu Kovalima inklui feto potensial sira oinsa bele halo jestaun ne'ebé di’ak iha eskola sira liu-liu ba prosessu ensinu aprendizajen.
Vise-Presidente INFORDEPE Rui da Costa Belo hateten, formasaun ne'e halo tanba durante ne'e diretur eskola sira balun la monitoriza professor sira ne'ebé hanorin iha turma laran, tanba ne'e liu husi formasaun ne'e bele kapasita lideransa iha eskola sira oinsa bele halo metro-sentradu ba alunu sira.
"Formasaun ne'e konaba jestaun lideransa ninian, oinsa maka diretur sira bele iha koñesimentu hodi halo observasaun ba professor sira ne'ebé maka hanorin iha turma laran, atu nune'e jestaun ne'e bele di’ak, liu-liu ba prosessu aprendizajem ninian, tanba durante ne'e diretur balun la monitora ninia professor sira ne'ebé hanorin iha sala laran, ne'ebé diretur sira mós tenke iha koñesimentu kona-ba planu da lisaun ka metrosentradu alunu sira ne'e oinsa, atu nune'e sira mós bele hadia bainhira professor sira hanorin laloos" Vise-Presidente INFORDEPE hateten ba jornalista sira iha salaun eskola Sekundária Jeral Públika (ESJP) Suai, Kovalima, Sesta 05 Novembru 2021.
Iha fatin hanesan, Kordenador EBC Dato-Tolu Adão da Cruz hateten, durante ne'e sira nia parte enfrenta difikuldade barak relasiona ho jestaun lideransa nian, tanba ne'e nia konsidera formasaun ne'e importante oinsa bele diriji professor sira atu hanorin tuir kurikulu ka metodu ne'ebé iha.
"Ami hanesan lideransa iha eskola durante ne'e ami hasoru difikuldade liu-liu jestaun lideransa nian, tanba ami menus koñesimentu kona-ba matéria ida ne'e, ne'ebé formasaun ida ba ha’u importante atu nune'e ami bele hatene oinsa maka bele diriji ka orienta ami nia professor sira hodi hanorin estudante sira tuir kurikulu no hanorin ho metodu ne'ebé maka tuir padraun" Adão dehan.
Formasaun ne'e organiza Ministériu Edukasaun Joventude no Desportu (MEJD), Parseiru ho ALMA no hetan fundu husi embaixada Australia iha Dili, Timor-Leste. Planu formasaun ne'e sei kobre teritóriu nasionál.
Formasaun kona-ba jestaun lideransa ne'e realiza iha salaun eskola Sekundária Jeral Públika (ESJP) Suai, ne'ebé hala'o durante loron rua, hahu husi loron Sesta 05 Novembru, no remata ona iha loron Sabado 06 Novembru 2021.
